Issittup imartaani ilimagisamit uumasoqarneruvoq

Issittup imartaani uumasoqarsinnaanera issittormiunit qularutigineqarsimanngisaannarunarpoq. Ilisimatuulli ilimagisaannit uumasoqarnerusoq paasineqartoq, nutaarsiassaqartitsivimmi Reuters-imi allaaserineqarpoq.

Ilisimatuut ilaatigut Alaskami ilisimatusarfimmeersut umiarsuarnik aqqartartunik inuttaqanngitsunik soonaarinillu aallartitsisarsimapput, Canadap sineriaani immap naqqani kilometeringajannik sisamanik ititigisumi misissuisitsillutik. Iluatsitsilluarpullu.

Ilisimatuut ilimasunngeruttorlutik nuarlunnik assigiinngitsorpassuarnik uumasunillu allanik nassaarput. Assersuutigalugu saarulleqarpoq, tupigusuutigineqaqisumillu amikoqarluni. Ilisimatuut issittup imartaani taama uumasoqartigisinnaaneranik ilimasussimanngikkaluarput.

- Uumasut tigusatta ilarparujussui ilisimatuunit ilisimaneqanngillat, imaassinnaalluarporlu, aatsaavissuaq takusoqartoq. Misissuisitsisut siuttuat Alaskap ilisimatusarfianeersoq Rolf Gradinger oqarpoq.

Misissuineq amerikamiut sikumik aserorterutaannit Healymit ingerlanneqarpoq, ullullu 30-t misissuinermut atorneqarlutik. Umiarsuaq taanna nunat tamalaat uumasoqarneranik misissuitsineranni ukiuni qulini ingerlanneqartumi atorneqarpoq.