Issittup imartaa gradinik marlunnik kissarnerulerpoq

Svalbardip imartaa aatsaat taama kissartigaaq. Tromsø Universitetimi ilisimatusartut sisamat saqqummersittakkami Science-mi taama allapput.
Allattoq Apollo Jeremiassen
januaarip 28-at 2011 07:52

- Ukiuni 2000-ni Golfstrømmip kissassusaa 3,5 gradit missaaniiginnartarsimavoq aalaakkaanani. Ukiunili kingullerni 30-ni immap kissassusaa gradenik marlussunnik kissarnerulersimavoq. Immap kissassusaa ukiuni 2000-ini nikingaartarsimanngitsoq eqqarsaatigalugu 2 gradit annertuupilussuupput, Tromsø Universitet-imi professori, Morten Hald oqarpoq.

Nunarsuatta avannaani immat immanut allanut naleqqiullugit kissarnerulersimaneri USA-mi, Tysklandimi Tromsømilu universitet-mi marinegeologit ataatsimoorussillutik paasiniaanerminni paasivaat.

Svalbardip Kalaallit Nunaatalu akornanniittumi imartami, 1500 meterisut ititigisumi, ilisimatuut uumasunik ujarannguussimasunik nassaarput, taakkulu misissoqqissaarneqarsimallutik.

- Immap kissarnerulernera aamma nunarsuatta kiatserujussuarnera, pinngortitap nammineq nukinginik pissuteqarnersoq paasineqarsinnaanngilaq, taamaattumik nunarsuatsinni oqartussat immikkut ittunik isumannaallisaataasinnaasunik piareersimatitsisariaqarput, norskeq professori, Morten Hald oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq