Issittup imartaa Akullersuartulli angallaffiutigilersinnaavoq

Amerikamiut paasisaat taanna ilisimatusaatit pillugit atuagassiami - sapaatip akunnerani matumani saqqummersumi allaaserineqarpoq. Ilisimatuut marluk, Scott Stephenson aamma Laurence Smith, tamarmik Californiami UCLA universitetimeersut misissuinerminni silap pissusaata allanngoriartuutigisinnaasat assigiinngitsut najoqqutaralugit misissuinerminnik ingerlatsisimapput.

Allattoq Marianne Stenbæk, Montreal, Canada, Frederik Lund

marsip 07-at 2013 06:09

Misissuinerit tamarmik tamanna ersersippaat. Tassa issittup imartaani Qalasersuarmilu sikup aakkiartuinnavittussaanera pissutigalugu taajassuma imartaa tamarmi umiarsuit atorlugit 2040-ip aamma 2050-ip akornanni tamakkiisumik ingerlaarfigineqarsinnaalersimassasoq.

Taamaalippallu tassa umiarsuit sikusiutaanngikkaluartulluunniit Sullualuk aqqusaarlugu ingerlaarsinnaasalerumaarput.

Tassa imaappoq assersuutigalugu Canadamiit Rusland toraaginnavillugu Qalasersuaq aqqusaarlugu ingerlasoqarsinnaasalerumaarpoq, massakkutut nunat assigiinngitsut sineriaat sinerlugit ingerlaartarnissaq pisariaarulluni. Tassalu taamaalippat angallaviusartut isorartussusaat innerungaatsialersussaavoq - ingerlaartarnerlu sivikinnerulertussaammat akikinnerusumik ingerlaartoqartarsinnaalerumaarluni.

Tamannali allanik aamma unammillernartoqalersitsissaaq. Tamakku ilaat tassaassangatinneqarpoq - ilaatigut umiarsuit takornariartaatit umiarsuillu allat - ullumikkornit annertunerujussuarmik taavani ingerlaartalertussaanerat nakkutigisinnaaniarlugu nunarsuarmioqatigiit imarsiornermi inatsisiliornissaat taamanikkornissaanut naammassineqanngitsoorsimassasoq.

Ajornartorsiutaasalersinnaasussaq alla tassaavoq Canadami Carlton universitet-imi misissuinertigut paasineqarmat taajanna sikuerulluni imaq ammaannartunngorpat anorersuit sakkortulerusalerumaartut - mallillu portunerusalerumaartut.

Issittup imartaa Akullersuartulli angallaffiutigilersinnaavoq

Aamma atuaruk