Issittup imaani upalungaarsimanerunissaq anguniassavaat

Issittup imartaani upalungaarsimanissaq pillugu inatsisitigut pituttuisumik isumaqatigiissusiortoqarnissaa, danskit nunanut allanut tunngasunut ministeriata Lene Espersenip naalakkersuisullu siulittaasuata Kuupik Kleistip Nuummi ulluni marlunni ataatsimiittarneranni oqaluuserisani pingaarnerpaavoq.

- Upalungaarsimanerup aallunnissaa pisariaqarluinnartoq qularutissaanngilaq, Lene Espersen oqarpoq.

Issittoq sikuerukkiartorluni umiarsuarnit angallaffigineqaleraluttuinnarpoq. Tassalu umiarsuit assartuutit ingammillu takornariartaassuit aqqutitigut, siornatigut atorneqarneq ajortutigut immallu assingini nalunaarsorneqanngitsutigut angalasaleraluttuinnarput. Tamatuma kinguneranik ikkarlittoqarnissaa allatulluunniit ajutoortoqarnissaa qaninnerulerpoq.

- Kalaallit Nunaata oqaluttuarisaanerani ajornaarnersuit annersarilersinnaavaat, ajutoorneq Kalaallit Nunaata avinngarusimasortaani pippat upalungaarsimasut apuunniarnissaat ajornakusoortupilussuusinnaammaat. Taamaammat upalungaarsimanerup aallunnissaat pingaaruteqarluinnartoq isumaqarpunga, Lene Espersen oqarpoq.

Issittumili upalungaarsimanissamut isumaqatigiissutissaq pituttuisoq, danskit kalaallillu issittumut politikissaata, Kuupik Kleistip piffissami kingullermi ujartugaata, Lene Espersenillu pisariaqarnerarlugu isumaqatigisaasa, ilaminiinnarissavaa.

Issittumi politikkissap imarisassa alla pingaartoq aamma isumannaallisarnermut tunngasuuvoq aammalu immami upalungarsimanertulli nukinginnarluni.

Tassalu Nunatsinni nunattalu eqqaani uuliasiortunut aatsitassarsiortunullu piumasaqaataasartussat.

- Tamakkua qitiulluinnartumik inissisimassapput. Mingutsitserujussuartoqassagaluarpat issittoq minnerunngitsumillu tamatuma imartai ajoquserujussuarneqarsinnaapput. Taamaammat tamaani isumannaallisaaneq isumannaallisaanermullu piumasaqaatit suliassani siullerpaanut ilaapput. Tamannalu Kuupillu isumaqatigiissutigaarput, danskit nunanut allanut tunngasunut ministeriat Lene Espersen oqarpoq.

Politikkikkut siuttut marluk aamma Hansip qeqertaa pillugu Canadamut isumaqatigiinniarnissat aammalu EU-p Nunattalu isumaqatigiissutaasa isumaqatigiinniutigeqqilernissat oqallisigaat.