Issittup atomip nukinganik sakkussiaqarfiunnginnissaa piviusorsiortuunngilaq

Issittup atomitalinnik sakkussiaqarfiunnginnissaa, Danmarkimi 2011-mi naalakkersuisunngortitsinermi isumaqatigiissutinut ilaavoq, tamannali anguniagaq piviusorsiortuunngilaq. Danmarkimi naalakkersuisut tamanna maanna nassuerutigigaat, aviisimi Sermitsiami allaaserineqarpoq.

- Issittumi atomitalinnik sakkussiaarunnissaanik Danmarkimi naalakkersuisut suliniuteqarnertik maanna unitsippaat, nunanut allanut tunngasunut ministeri tunuaqqammersoq Holger K. Nielsen SF-imeersoq aviisimut Berlingskemut taama oqarpoq.

Taama isummerneq piviusorsiortuunngitsutut nunanut allanut ministeeriaqarfimmit nalilerneqarsimasoq, taama oqaaseqarnerminut nassuiaatigaa.

Taama oqaaseqarnera, minnerunngitsumik Sara Olsvigip IA-meersup pakatsissutigaa.

-  Issittumi atomitalinnik sakkussiaqassanngilluinnartoq, Inuit Ataqatigiit isumaqarput. Taamalu isummernerput taamaattussaannartut isigaarput. Issittormiuusugummi sakkutooqarfiit annertusaavigineqarnissaat imaluunniit sakkussianik atomitalinnik eqqatsinniittoqarnissaa soqutigisarinngilluinnarparput, Sara Olsvig Sermitsiamut oqarpoq.

Holger K. Nielsenilli erseqqissarpaa, Issittup atomitalinnik sakkussiaarunnissaanut isummamut isumaqataagami, tamannali piviusorsiortuunngitsoq oqaatigalugu.