Issittup atomimik sakkussiaqannginnissaa siunnersuutigaa
- Nunat atomimik nukissiuuteqarfiusut Issittoq pillugu aporaatileratarsinnaanerat aarleqqutigineqarsinnaavoq, Zenia Stampe oqarpoq.
Issittup atomimik sakkussiaqarfiunnginnissaa pillugu Nunat tamalaat isumaqatigiillutik aalajangersagaliornissaat, taassuma takorloorpaa, soorlu Sikuiuitsoq Kujallermi, Afrikami, Latinamerikami Kangiatalu kujasinerusortaani tamanna pillugu aalajangersagaliortoqarsimasoq.
Taamaaliortoqarpat atomimik sakkussialiortoqaqqusaananilu toqqortaateqaqqusaananilu atuisoqaqqusaanngilaq, aatsitassalli qinngornernik ulorianartunik akulinnik piiasoqarsinnaassaaq, atomimillu nukissiuuteqartoqarsinnaalluni.
Nunatsinni taamaalilluni uranisiortoqarsinnaassaaq, umiarsuillu sikunik aserorterutit atomip nukinganik nukissiuutillit atorneqarsinnaassallutik.
Issittup atomimik sakkussiaqarfiunnginnissaa pillugu isumaqatigiissusiortoqassappat tamanna Issittumi Siunnersuisoqatigiinni piviusunngortinneqarsinnaasoq, Zenia Stampep oqaatigaa:
- Nunat avannarliit tallimat Issittumi Siunnersuisoqatigiinni ilaasortaapput, soorlu aamma USA, Rusland Canadalu ilaasortaasut. Nunat avannarliit matumani minnerpaajunerat miserratigisinnaanngilarput. Canadali atomimik sakkussiaqanngilaq, nunallu atomimik sakkussiaqanngitsut amerlanerusut isumaqatigiissusiorsinnaappata, tamanna pingaarutilerujussuanngorsinnaavoq, Zenia Stampe, De Radikaleneersoq Berlingske Tidendemut ilaatigut oqarpoq.