Issittuni inoriaatsit pillugit misissuinerit inerneri takkutingajalerput
Nunani issittuni inooriaatsit pillugit sukumiisumik misissuinersuarmit inernerit siulliit takkutillattaalerput.
Suliniut ukiut qulit matuma siornagut aallartinneqarpoq, 2001-imiit nunap inoqqaavi 7000-it Nunatsinni, Canadami, Alaskami aamma Chukotka-mi najugaqartut inooriaasii pillugit apersorneqarput.
Maanna paasissutissat katersorneqareersimalerput takussutissiorneqarlutik nalunaarsorneqarlutillu, maannalu kisitsit issittumi inuuniarneq pillugu qanoq takussutissiinersut paasiniarneqaleruttorpoq. Sapaatip akunnerani kingullermi inernerit siulliit peqqissuunermut tunngasut takkussuupput, taakkualu paasissutissarpassuit ilamininnguaannarigai suliniummi pisortaasoq Birger Poppel oqarpoq.
Paasissutissat tamakkua ilaatigut misissoqqissaarsinnaavavut annerusumillu ilisimatusarfigalugit. Aamma paasiniarsinnaavarput suunukua patsisigalugit inuit inuunertik pitsaasutut imaluunniit pitsaanngitsutut nalileraat, aamma nunat assigiinngitsut sanilliussiffiginerisigut tamakkua paasisaqarfigisinnaavavut, Birger Poppel oqarpoq nangillunilu:
- Tamatuma saniatigut paasissutissat naalakkersuinikkut aalajangiinissani tunngavigineqarsinnaapput. Soorlu oqaatsinut tunngasut oqallisigineqartorujussuusarput, ilaatigut oqaatsivut qanoq pigiinnarsinnaanerivut ineriartortissinnaanerivullu aamma danskit oqaasiinik ilinniarneq qanoq ingerlanersoq, tamakkununnga tunngasorpassuarnik paasissutissanik peqarpoq. Aamma paasissutissat aalisarnermut piniarnermullu tunngasut pigineqarput, kalaallit qangaaniilli nerisassaataannut tunngasut, tamakkualu inuunermik pitsaasumik ingerlatsinissamut aamma kinaassutsimut qanoq sunniuteqartarnersut aamma ilaqutariit aningaasaqarniarnerannut qanoq sunniuteqarnersut. Aamma paasissutissat ilaat piniartuunerup siunissaa pillugu oqallinnermi aallaavigineqarsinnaapput, Birger Poppel naggasiivoq.
Misissuinerup inerneri maannakkuugallartoq taamaallaat tuluttut pissarsiarineqarsinnaapput, taamaattorli kingusinnerusukkut kalaallisuunngortinneqarlutillu danskisuunngortinneqassapput. Misissuineq pillugu annerusumik uani paasisaqarsinnaavutit: www.arcticlivingconditions.org
