Issittumut ukiorititaasoq Canadami pissarsiffiulluarpoq
Nunat tamalaat issittumi ukiorititaat - ukiut kingulliit tulleriit ingerlanneqartut naammassereeraluartut suliniutit arlallit Canadami suli ingerlapput.
Issittumi ilisimatusarnerit sukumiinerusut nunallu tamalaat suleqatigiinnissaat ukiorititaqarnermi siunertaavoq, taamaammallu Canadami suliniuteqarnerni nunaqarfiit kattuffiillu peqataatinneqarnissaat pingaartinneqarluni. Oqartussaq ukiunut 2007-imit 2009-mut 750 millioni koruuninik aningaasaliipput.
Ilisimatusaatigineqartut ilagaat Makiviup Canadallu aalisarnermut ministereqarfiata suleqatigiillutik piniartut qilalukkanut qaqortanut tunngatillugu ilisimasaannik aamma qilalukkat qaqortat satellitikkut nassitsusilersukkanit paasisanik misissuinerit assigiinngissutsinik assigiissutinillu paasissutissiisoq.
Makivik ukiut 33-t sinnerlugit atuagassiamik saqqummersitsisarpoq, Nunavimmiut allaaserisisaannik oqaluttuaannillu imaqartumik. Saqqummersitat Nunavimmi inuunermik paasissusissatsialaammata eriagineqaqaat, taamaammallu atuakkatut saqqummersinniarneqalerlutik.
Makiviup universitetit marluk McGill UQAM-ilu Montrealimiittut suleqatigalugit, atuakkat sisamat saqqummersissavaat, siulleq qanga oqaluttuanik imaqartussaq ukiormanna saqqummissaaq tullia qanga inuunermut tunngasoq aappaagu saqqummissalluni.
Pisut ilagaat nunaqarfimmi Kangiqsualujjuaq-mi najugallit ilisimatusartunik ukiorpassuarni suleqateqartarsimasut ulunik, savinnik ammillu atorlugit aaqqatilianik sannarinneqqusaatsitaasimanerat. Unammisitsineq taanna nunaqarfimmiut ikiuulluartarnerannut qujassutitut Nunat tamalaat issittumi ukiorititaannut atatillugu aaqqissuisunit aaqqissuunneqarpoq. Suliat unammissutaasut nunaqarfiup katersugaasiviani sanaartorneqangajalersumi saqqummersinneqassapput. Tamakkuupput Nunavimmi suliniutit ilaannanngui. Canadap sinnerani issittumi ilisimatusarnerit aamma ingerlanneqartut arlalissuupput.
