Issittumik ilisimatusarneq 16 mio. kronennappoq

Danmarkimi Naalakkersuisut Socialdemokratillu isumaqatigiissutigineqarput, issittoq pillugu ilisimatusarnermut 16 mio. koruunit atorneqassasut.

Naalakkersuisut De Radikale Venstre-t SF-illu 855 mio. koruunit toqqammavigalugit isumaqatigiinniarsimapput. Aningaasat taakku 2001-imi mobiltelenette-qartoqalernissaa anguniarlugu akitsorterussisoqarnerani katersaapput.

Aningaasat amerlanersaat ilisimatusarnernut atorneqassapput. Taakkunannga 16 mio. koruunit issittoq pillugu ilisimatusarnermut atoriarlugit sinneruttut 550 mio. koruunit teknikkikkut ineriartornermut qarasaasiaqarnermullu atorneqassapput.

Folketingimi ammaalluni oqallittoqarnerani Inuit Ataqatigiinneersup Kuupik Kleistip siunnersuutaa statsministerip Anders Fogh Rasmussenip itigartippaa. Kuupik Kleistip siunnersuutigaa, aningaasat 100 mio. koruuninik nunat tamalaat issittumut 2006-miit - 2008-mut ukiorititaqarneranni suliniarnernut atorneqassasut.

Kuupik Kleist itigartinneqaraluartoq, taamaattoq maanna issittoq pillugu ilisimatusarnermut aningaasaliisoqartussanngorpoq.