Issittumi uumasut naasullu tamakkerlugit nalunaarsorneqarsimalerput

Issittumi Siunnersuisooqatigiit nalunaarusiaanni nutaami Issittumi uumassusillit assigiinngitsorpassuit tamarmiutillugit inissisimanerat pillugu siullerpaamik nalunaarusiarineqarpoq.
maajip 21-at 2013 12:07

Nalunaarusiarsuaq, Arctic Biodiversity Asessment, Issittumi Siunnersuisooqatigiit Kirunami sapaatit akunnerata siuliani ataatsimiinneranni saqqummiunneqartoq ukiuni arfinilinni suliarineqarsimavoq, ilisimatuullu 250-init amerlanerusut ilanngussisimallutik.

Uumasut miluumasut, timmissat, aalisakkat, naasut, pupiit, miluuttut bakterissallu 21.000-init amerlanerusut Issittumi umasuupput. Nalunaarusiaq 600-t sinnerlugit qupperneqarpoq 21-nillu kapitaleqarluni. Allaaserineqartullu nuannerpallaanngillat.

- Silaannaap pissusiisa allanngoriartorneri Issittumut sakkortuumik sunniuteqarsinnaapput. Uumasut kujasinnerusumeersut silaannaata allanngoriartornera iluaqutigisinnaavaat - assersuutigalugu avannarpartersinnaanngussallutik, uumasulli issittumi pissutsinut immikkut naleqqussarsimasut ajornartorsiulissapput, Aarhus Universitetimi ilisimatuut pisortaat nalunaarusiami aaqqissuisuusoq oqaluttuarpoq.

Uumasut neriniarnissaminnut apummik sermimillu pisariaqartitsisut silaannaap pissusiisa allanngoriartornerinik ulorianartorsiortinneqarput: natseq, ussuk, aataaq, natsersuaq, nanoq, arfivik, umimmak terianniarlu.

Issittumi uumasut aamma allatigut ulorianartorsiortinneqarput, tassalu piniarneqarnermikkut, Hans Meltofte naqissusiivoq.

- Inuit taama amerlatigisut timmissanik uumasunillu miluumasunik piniarnermik inuuniuteqarnerisa sunniuteqarnerlussimanera avaqqunneqarsinnaanngilaq. Uumasoqatigiiaat ilaasa piniagaanermikkut ikileriarsimanerannut assersuutissat arlaqarput, uumasulli ilaasa piniapilunneqarsimasut ukiuni kingullerni killilersuiffigineqalernerat iluaqutaavoq, tamannali uumasunut tamanut suli atuutilinngilaq. Kalaallit Nunaata kitaani appat tamatumani assersuutissaalluarput.

Hans Meltofte naapertorlugu Upernavimmit Qeqertarsuarmut appat 99 procentit sinnerlugit ikileriarsimapput, piniagaanerallu tamatumani pissutaanerpaalluni.

Nalunaaruamittaaq Issittumi uumasut naasullu nalunaarsorneqarnerisa saniatigut aamma ilisimatuut issittumi nunat siuttuinut arlariinnik siunnersuusiorsimapput.