Issittumi uuliasiorneq aatsitassarsiornerlu Greenpeace-mit akiorniarneqarnialerpoq.

Pinngortitaq illersorniarlugu issittumi uuliasiorneq aatsitassarsiornerlu Greenpeace-mit akiorniarneqarnialerpoq.
februaarip 09-at 2009 17:18

Issittumi Siunnersuisoqatigiinni ilaasortat naalakkersuisuisa Norgep avannaani, Tromsømi, apriilip 28-anni 29-annilu ataatsimiinnissaat sioqqullugu, februaarip ulluisa qulinganni aqqarngannilu taamanikkussamut oqaluuserisassat siunniunneqartullu atorfillit piareersartussaavaat. Piareersaanissarlu sioqqullugu tassa maanna Greenpeace-miit piumasaqaat nassiunneqarpoq.

Silap kissatsikkiartornerata kinguneri issittumi malunniukkiartuinnarmata, naalagaaffiit issittup eqqaaniittut pinngortitamik ajoquseeriataaqqunagit, uuliamik aatsitassanillu qalluiniarunnaaqqullugit, Greenpeace piumasaqaateqarpoq.

Issittumi Siunnersuisoqatigiit ilaasortaat, naalagaaffinnit issittumut qanittuneersuusut tassaapput, Nunat Avannarlerniit naalagaaffiit tallimat, USA, Canada kiisalu Rusland. Siunnersuisoqatigiiffik inatsisiliorsinnaatitaanani naalakkersuisunut innersuussuteqaannarsinnaavoq.

- Nukissiuutit mingutsitsissutaanngitsut atorlugit nukissiornissaq pimoorullugu anguniarnagu, nunat issittumiittut uuliasiorniarlutik sikup aannissaa utaqqiinnarpaat. Taama iliorneq pissutsit ajortikkiartuinnarnerannik kinguneqartussaammat, aamma Issittumi Siunnersuisoqatigiit tamanna akiorniartariaqaraluarpaat, Greenpeace ilaatigut allappoq.