Issittumi uuliamik assartuinissamut isumassarsiat nutaat
Rambøllimi ingeniørit marluk taama isumaqarput. Taakku Rambøllip sulisumi akornanni unammisitsinerani isumassarsiartik saqqummiuppaat. Nunarsuup avannaarsuani kulbrintissarsiuleruttortoqarmat ingeniøritut siunnersuisarfiup isumassarsiaq ima torragitigaa ingeniørit taakku marluk akissarsitinniarlugit aalajangersimalluni, isumassarsiarlumi maannangaaq ineriartorteqqillugu suliaqalereersimavoq.
Issittup imartaata naqqani qooqqiniliorluni imaluunniit meterinik 15-inik assaalluni ruujorilersuinissamik isumassarsiaq Issittumi uuliamik gassimillu qallukkamik isumannaatsumik assartuussinissamik pisariaqartitsinermut atorneqarsinnaalluartoq, Ingeniøren.dk allappoq.
- Issittup imartaata itisoorsuusup naqqata iluanut ruujorinik assaassineq siornatigut misilinneqarsimanngilaq. Ilisimaneqarpormi ilulissat sikullu immap naqqa kiliortortaraat allaat immap naqqata iluani meterinik qulingiluanik ilorpasitsigisumi aseruisinnaasarlutik, Kai Olsen, Ramboll Oil & Gassimi Innovation Forumimi pisortaq, issittumilu suliniutinik uuliasiornermut atasunik ukiuni 25-ni suliaqarsimasoq oqarpoq.
- Taamaammat ruujorit meterinik 15-inik assaanneqassapput, taamaaliussagaannili immikkut periaaseqartariarpoq sakkunillu immikkut ittunik atuisoqartariaqarluni. Soorlu assersuutigalugu imartani allanisulli assallatseraluni qooqqiniliortoqarsinnaanngilaq.
Periaasissamillu nutaamik maanna misissuisoqartussanngorpoq:
- Ajornartorsiutigineqarsinnaasussat nassaariniartussaassavagut, soorlu immap naqqa aqitsoq manngertorujussuarlu misileraaffigalutigit, Kai Olsen oqarpoq, aamma uuliasioqatigiiffiit arlaata periaaseq atorusussappagu sukkasuumik atorneqaleriaannaassasoq ilanngullugu oqaatigaa.
Rambøll issittumi suliniutinut arlalinnut peqataavoq, ilaatigut Shellip Ruslandip kangiani Sakhalin-2-p, Ruslandimi siullersaalluni sinerissap avataani immap naqqatigut aqqusersuutinik gassimut atuiffiusussami ruujoriliinissap pilersaarusiorneqarneranut aammalu Statoilip itisoorsuami ruujorilersuinerani Aasta Norskehavetimi Hansteen-feltimit Nyhamnami gassimik katersuivimmut ingerlaartup suliarineqarneranut peqataalluni.
