Issittumi upernajaarnerusalernera ilisimatuunit maluginiarneqartoq

Ukiut qulit matuma siornagut pisartunut sanilliullugu Issittumi upernajaarnerusalerpoq. Tamanna danskit ilisimatuut atuagassiami ilisimatusarnermik sammisaqartumi Current Biology-mi oqaatigaat.

Issittumi upernajaarnerusalernera ilisimatuut nunarsuup kiatsikkiartorneranik patsiseqarnerarpaat.

- Ilisimatusarnitta, allat maluginiariigaat uppernarsarpaa, tassa ukiup kaajallakkiartornermini nikerarneri allanngoriartortut. Aamma matumani ukiup ataatsip marlulluunniit kiannerunerat pineqanngilaq, kisianni ukiut qulit ingerlaneranni sakkortuumik kianneruleriartornera pineqarpoq, biolog Toke T. Høye Aarhus Universitetimi Danmarkimi Avatangiisinik Misissuisoqarfimmeersoq Ritzauimut oqarpoq.

Misissuineq Tunup avannaani ingerlanneqarsimavoq. Ilisimatuut maluginiarsimavaat upernarneranut ilisarnaataasartut soorlu naasut naajoralertarnerat timmissallu manniliulertarnerat siornatigumut naleqqiullugu siusinnerujussuanngorsimasoq.