Issittumi Teknologi

Allattoq Jokum Nielsen
juulip 21-at 2006 16:58

Teknikkikkut issittumi ineriartortsitivimmik nunarput pisaalerpoq, ineriartortinneqassapput nukissiuutit, avatangiiseq aammalu sanaartorneq.

Sananeqartoq taanna, Sisimiuni ukiap ingerlanerani atoqqaarfissiortinneqartussaq, Danmarkip Teknikkikkut Ilisimatusarfissuata, Dansk teknologisk Institut –ip, Sisimiunilu Sanaartornermik Ilinniarfiup suleqatigiissutigalugu ineriartortitaasa ilagaat, taama oqarpoq Sisimiut Kommuniani pilersaarusiornermi siunnersorti Laust Løgstrup. Laust Løgstrup oqarpoq, teknikkikkut ineriartortitsivik Kalaallit Nunaani innuttaasunit tamanit iluaqutiginiarneqarsinnaasoq. Aamma nunatsinni tamani tamaani isumassarsianik peqartoqassasoq ineriartortinneqarsinnaasunik, taamaalilluni nunarput tamakkunatigut qaffassarneqarsinnaalluni.

Nukissiuutitigut ataavartumik iluaqutigineqarsinnaasut suuneri Laust Løgstrup–ip nassuiaatigigamigit, taassaanerarpai erngup nukinga atorlugu nukissiorfiit pigeriikkavut. Taakkua saniatigut tassaanerarpai seqernup kissaa atorlugu nukissiuuteqarneq aammalu anorisaatit.

Aamma nutaaliatut ineriartorteqqitassatut pissanganartutut taavai mallit atorlugit, kiisalu ulinnerup nukinga atorlugu nukissiuutit.

-Naatsorsuutigaarput nukissiuutit taakkorpiaat pillugit, una teknikkikkut ineriartortitsivissaq aallarteriarpat, siullerpaajullugit ukiaru pikkorissassutigineqassasut, Laust Løgstrup naggasiivoq. Sisimiut Kommuniat 7 mio. koruuninik tapiissuteqarluni amutsivikup allanngortiterneranut aningaasaliisimasoq, Namminersornerullutik Oqartussat ingerlatsinermut atugassanik tapiissuteqarsimavoq.