Issittumi takornariartitsisartut timmisartuaqqat inuttaqanngitsut inerteqqutigigaat

Timmisartunik inuttaqanngitsunik atuineq nunarsuaq tamakkerlugu annertusiartupilooraluartoq issittullu imartaani umiarsuit tikissinnaasaat nutaat amerliartoraluartut, umiarsuarnut takornariartaatinut ilaasut issittumi angalatillutik timmisartunik inuttaqanngitsunik mikisunik nassarnissaat inerteqqutaassaaq.
Assi © : Lee/Flickr
Allattoq Karsten Sommer
maajip 12-at 2015 10:37
Nutserisoq Simon Uldum -

Association of Arctic Expedition Cruise Operators (AECO), paasisassarsiortunik takornarianillu umiarsuarmik issittumi angallassisartut nunani tamalaani suliniaqatigiiffiat taama aalajangeeqqammerpoq.

Taamatut aalajangiisoqarneratigut suliniaqatigiiffiup issittumi angallatitaata timmisartunik inuttaqanngitsunik atuinissaat inerteqqutigineqalerpoq.

AAMMA ATUARUK Mittarfeqarfiit timmisartuaqqat aquttoqanngitsut inerteqqutigaat

- Angallassatta timmisartunik inuttaqanngitsunik pinngortitami atuinissaat kissaatiginngilarput, tamanna uumasunik, timmissanik angalasunillu allanik akornusersuinngitsoornavianngimmat. Aamma timmisartunik inuttaqanngitsunik imaanut allanulluunniit nakkartoqassagaluarpat issittumi pinngortitamik mingutsitsisinnaammata, AECO-mi pisortaaneq, Frigg Jørgensen, tusagassiorfinnut nalunaaruteqarluni taama allappoq.

AECO-mut ilaasortaasut ilaatigut tassaapput danskit, svenskit, tuluit, russit, canadamiut amerikamiullu suliffeqarfii takornariartitsinermik suliaqartut.