Issittumi takornariartaatileriniarneq apeqquserneqartoq
Crystal Serenity takornariartaatini Sullualukkoortussani siulliunngilaq, umiarsuarujussuarli umiussagaluarpat qanoq iliuuseqartoqarnissaanut immikkut ilisimasallit aarleqqutigaat:
Alaskaminngaanniit ulluni 32-ni kangimut Sullualukkut angalaarluni 2016-imi aggustimi New Yorkiliarsinnaanissaq, takornariartitsisartut Crystal Cruisesip neqeroorutigissamaarpaa.
Taamatut angalasinnaanerup inunnut avatangiisinullu aarlerinartoqarsinnaanera, immikkut ilisimasallit annilaanngatigaat. Immakkut angallannermik immikkut sammisalik Maritime Executive taama oqartoq atuagassiamit Ingeniørenimit issuarneqarpoq.
Isumannaallisaaneq naammanngitsoq
Naak Crystal Serenity umiarsuarmik isumannaallisaanermut atortussanik usisumit ingiallorneqartussaagaluartoq, takornariartaatip Sullualukkoortinneqarnissaa, umiarsuit ingerlaarnerannik pilersaarusiortartuni Tactical Marine Solutionsimi suliallip Dermot Lougnane-ip ernummatigaa.
Loughnane, uuliasiortitseqatigiinni assigiinngitsuni atorfeqarnikuuvoq, Issittumi angallannermik misilittagaqarluni.
- Takornariartaassuaq Aasuitsumut apuuttoq eqqarsaatigilaariarutsigu. Aasuitsumi oqartussat isumannaallisaanermut atortussanik naammattunik peqanngillat. Takornarialerisut qulimiguulimmik peqarput, kisianni taava qimagutitinniarunikkit sumunnaatissavaat? Avatangiisinik illersuiniarnermut atortussat naammanngillat, pingaartumillu annaassiniarnissamut periarfissat killeqarlutik, Dermot Loughnane oqarpoq, nangillunilu:
- Takornariartitsisartulli taamatut angalatitsisarnerat nuannarineqaleraluttuinnassappata ajornartorsiutaanerulersinnaassaaq. Naak Issittumi nunaqarfiit aningaasarsiorluarsinnaalissagaluartut isumannaallisaaneq aamma pingaartinneqartariaqarpoq, Dermot Loughnane oqarpoq.
Immat aasingi tutsuiginanngitsut
Canadami Newfoundlandimi Memorial Universitymi professorip Ross Kleinip Issittumi immat assingisa tutsuiginassusaat aamma apeqquserpai, naallu Crystal Serenityp ajutoornissaa ilimananngikkaluartoq suli ajutoortoqaratarsinnaavoq:
- Taamaalisoqassappallu annaassiniarnissamut atortussat killeqassapput, Ross Klein oqarpoq.
Imeq umiarsuarmit aamma maangaannartinneqartoq ajornartorsiutaasinnaasoq, taassuma eqqaasitsissutigaa:
- Umiarsuup Issittumi sapaatip-akunnerini pingasuni angalanissaa eqqarsaatigalugu imeq maangaannartinneqartoq annertussaaq, eqqagassallumi aamma qanoq iliorneqassappat? Klein aperivoq.
