Issittumi Siunnersuisoqatigiit piujuartitsineq oqallisigaat
Suleqatigiinni, SDWG-mik naalisarneqartartumi, Kalaallit Nunaat siulittaasuuvoq. Aamma nunat inuiisa kattuffiisa Naalagaaffiit naligalugit peqataaffigisaanni, ataatsimiinnermi tassani aalajangiunneqarpoq, ICC - Kalaallit Nunaat Nunatta siulittaasuunerani siulittaasooqataassasoq.
Ataatsimiinnermi salliutillugit sammineqarput siulittaasuunermi ukiunut tulliuttunut marlunut pilersaarutit, aammali Nunatta ilisaritinnera pingaartutut ilagitillugu.
Naalakkersuinikkut pissutsit nutaat pillugit saqqummiussineqarpoq, SDWG-milu peqqinneq pillugu ilisimasalittut suleqatigiinngortuni, Arctic Human Health Expert Groupimi, killiffik pillugu ilaasortat pingasut ilaannit nassuiaasoqarpoq, aamma imminut toqunnermik PAARISA-mit pinaveersaartitsineq pillugu isumasioqatigiinnissamik pilersaarut saqqummiunneqarpoq, taannalu tassa suleqatigiit taakku suliniutaasa siulliit ilassaat.
Piujuartitsineq pillugu Suleqatigiit, SDWG, tullianik ataatsimiissaaq novembarip ulluisa qulinganni aqqarngannilu, ataatsimiinnerlu Københavnimi pissaaq.
