Issittumi Siunnersuisoqatigiit pissaaneqarnerulernissaat kissaatigaa
Issittumi Siunnersuisoqatigiit pissaaneqarfiunerusumik oqallittarfiunissaat Canadami Norgep aallartitaata qaammatip ataatsip matuma siornagut siunnersuutigaa. Tamanna isumassarsiatsialaagunarpoq, tassami
danskit nunanut allanut ministeriat Lene Espersen isumaqataammat.
- Issittumi Siunnersuisoqatigiit ullumikkutut pissaaneqartigitillugit taakkua inatsisit tunngavigalugit oqallittarfittut arlalippassuarnullu atuutilersinneqarnissaat soqutigaarput, tamatumani nunap inoqqaavi, avatangiisit kiisalu ujaasinerit annaassiniarnerillu pillugit aalajangiinerit pisassammata, qallunaat nunanut allanut ministeriat oqarpoq.
Taanna ilanngullugu oqarpoq, utaqqiisaannaagallartumik allattoqarfimmut ullumikkut nalunngisatsinnut taarsiullugu ataavartumik allattoqarfiliornissaq pingaaruteqartoq.
Tamannalu aamma Norgep aallartitaata maajimi oqaasiinut naapertuuppoq.
Tamatumunnga peqatigitillugu Espersenip erseqqissarpaa nunat arlallit nunanik issittunik soqutigisaqarnerat paasilluarsinnaagini.
- Taakkua alaatsinaattuunissaminnut akuerineqassapput, Issittumili Siunnersuisoqatigiinni nukittunerusuni nunat issittut nukittujuarnissaat qulakkeerneqassalluni, Lene Espersen isumaqarpoq.
