Issittumi Siunnersuisoqatigiit nutarsartariaqarsoraat
Issittumi Siunnersuisoqatigiit 1996-imi pilersinneqarmatali oqallisaanerusartut tassaapput issittumi suleqatigiinneq, issittumi avatangiisit illersorneqarnissaat aamma aningaasaqarnikkut, isumaginninnikkut kulturikkullu atugarissaarnissaq.
Avatangiisit innarlitsaaliorneqarnissaat Issittumi Siunnersuisoqatigiit ullormut oqaluuserisassaanni suli ilaatinneqarnikuunngilaq. Apeqqutip taassuma oqallisigineqarnissaa USA-mit immaqa kissaatigineqanngimmat taamaalluni.
Avatangiisilli illersorneqarnissaat Issittumi Siunnersuisoqatigiit ilanngullugu oqaluuserisassagaat amerikamiut isummersuisit maanna tassa angunialerpaat. Nunatsiaq Newsimi tamanna allaaserineqarpoq.
Issittup nakkutigineqarnerunissaa nunap inuiisa siunissami akuuffiginerulertariaqarpaat, isummersuisit piumasaqarput, Inuit Issittormiut Siunnersuisoqatigiiffiat Inuit Issittormiut Kattuffiannik taaguuteqarallarmat præsidentiusimasoq, Sheila Watt Cloutier, isummersuisini aamma ilaasortaavoq.
Naalagaaffiit issittumut atanngitsut, soorlu EU, ataavartumik alaatsinaattutut siunissami ataatsimeeqataasalertariaqartut Aspen Institut aamma isumaqarpoq.
Ataatsimiititaliap siunnersuutaasa ilusilersornissaat piviusunngortinnissaallu anguniarlugu, Issittumi naalakkersuisut immikkut ittumik 2012-imi ataatsimeersuarnissaat ataatsimiititaliap siunnersuutigaa, nunap inuii issittumilu naalagaaffiit arfineq-pingasut ataatsimiinnermi peqataanissaat aamma siunnersuutigalugu.
