Issittumi Siunnersuisoqatigiit avaqqullugit ataatsimiinnissaq Danmarkip aalajangiusimavaa
Rob Huebertip, Alaskami Calgarymi Universitetimeersup, Islandip, Sverigip aamma Finlandip ataatsimeeqataanissaat puimasarigaluarpaa, CBC North nittartakkamini taama allappoq.
Danmarkip, USA-p, Canadap, Norgip aamma Ruslandip nunanut allanut ministerii Ilulissiassapput, Qalasersuup imartaata nunanit pineqartunit saqitsaassutigineqarnera oqallisigissallugu, aamma annertuumik uuliakoortoqassagaluarpat upalungaarsimanissaq pillugu annerusumik suleqatigiittoqarsinnaanissaa aamma oqallisigineqassaaq.
- Island, Sverige Finlandilu ataatsimiinnissamut qaaqqusaasimasussaagaluarput, aamma Danmarki aaqqissuisuunani Issittumi Siunnersuisoqatigiit ataatsimiinnissamik aaqqissuisuusariaqaraluarput, Huebert oqarpoq, taamaalilluni Issittumi Siunnersuisoqatigiit sunniuteqarnerulersinnaassasut oqaatigalugu.
Ilulissani ataatsimiinnermi aalajangiussat pillugit Issittumi Siunnersuisoqatigiit ilisimatinneqartarumaartut, Thomas Winklerip, Danmarkimi nunanut allanut ministeeriaqarfimmeersup neriorsuutigaa:
- Ilulissani ataatsimiinnissaq Issittumi Siunnersuisoqatigiinnut unammillernerunngilaq. Ataatsimiinnermi sammisassat ataatsimeeqataasunit nammineq akisussaaffigineqassapput, Thomas Winkler oqarpoq.
Islandimiut ataatsimiinnissamut qaaqqusaannginnertik ajuusaarutigaat, naammagittaalliorsimallutillu, Ilulissanili ataatsimiinnerup Islandimiunit qanimut malinnaavigineqarnissaa erseqqissarneqarpoq.
