Issittumi siunnersuisoqatigiit ataatsimiinnerannut Canada ilaajumanngillat

Canada Issittumi siunnersuisoqatigiinni siulersuisuutitaqaraluartut siunnersuisoqatigiit sapaatip akunnerani uani ulluni marlunni ataatsimiinnerannut ilaajumanngillat.

Ataatsimiinnerimmi Moksvami ingerlanneqarput, tamannalu pillugu Canada peqataanani, ”Ruslandip Ukrainemi pisunut akulerunnera, Krimimilu pissusilersorneranut akuerineqarsinnaanngilluinnartut pissutigalugit” Canadap avatangiisinut ministeria Leona Aglukkaq oqarpoq, taanna maanna Issittumi siunnersuisoqatigiinni siulittaasuuvoq.

- Issittumi siunnersuisoqatigiinni siulittaasuutitaqarnermi siulersuinini Canadap tulluusimaarutigaa. Ruslandillu Ukrainemut pissusilersornera pissutigalugu sapaatip akunnerani uani Moskvami suleqatigiissitat ataatsimiinneranni Canada peqataanianngilaq, oqarpoq.

Ataatsimiinnerit suleqatigiissitat atorfilittat ataatsimiinnerivaat, ministerinillu peqataasoqarani. Taamaammat ilaajumannginneq takussutissaanaavoq.

Atorfilittat Canadameersut Ruslandimeersullu sapaatit akunneri pingasut matuma siornatigut Yellowknifemi naapereerput, nunat arfineq pingasut Issittumi siunnersuisoqatigiinni ilaasortat ataatsimiimmata.

Canada, Moskvami ataatsimiinnerni peqataanngikkaluarluni, ”Issittut siunnersuisoqatigiivini suliat pingaaruteqartut” suli tapersersorai, Leona Aglukkap erseqqissarpaa

Issittumi siunnersuisoqatigiinni ukiut tulliuttut marluk Canada siulittaasuutitaqarpoq, Danmark/Kalaallit Nunaat, Norge, Sverige, Finland, Island, Rusland USAlu Issittumi siunnersoqatigiinnut ilaasortaapput.

Inuit Issittormiut Siunnersuisoqatigiiffianni siulittaasoq, Aqqaluk Lynge, ullumi oqarpoq, ajoraluartumik Krimimi pisut Issittumi siunnersuisoqatigiit suliaannut sunniuteqassasoq naatsorsuutigineqarsimasoq.

- Pissaanilissuit akerleriinnerat Issittumut sunniuteqaqqinnera ajuusaarnarpoq, ICC-p siulittaasua allappoq.