Issittumi Siunnersuisoqatigiit ataatsimeersuarnermi nersualaarneqarlutillu isornartorsiorneqartut
Nunanut allanut naalakkersuisoq Vittus Qujaukitsoq issittumi naalagaaffiit nunanut allanut ministerii peqatigalugit ataatsimeersuarnermut aamma peqataavoq.
Issittumilu Siunnersuisoqatigiit iluatsilluarsimasutut arlalinnit taaneqarput.
Norgemiut nunanut allanut mininisteriat Børge Brende naapertorlugu, siunnersuisoqatigiit angusimasaasa annersaat tassaavoq Issittumi eqqisseqatigiinnerup attatiinnarneqarnera, naak nunat arlalissuit suliffeqarfissuillu Issittoq aningaasatigut soqutigisaqarfigigaluaraat.
Issittumi Siunnersuisoqatigiit aamma nunarsuup ilaani silap pissusiata allanngoriartornerata nakkutigilluarneqarnissaata sammineqarnissaatalu qulakkeerniarnissaanut suleqataalluarsimasut Brendep erseqqissaatigaa.
Aammattaaq amerikamiut tungaannit, Issittumi Siunnersuisoqatigiinni maanna siulittaasuutitaqartunit, eqqisseqatigiinnerup, sillimaniarnerup avatangiisillu siunnersuisoqatigiinni suliassat pingaarnersaattut taaneqarput.
Aammali isornartorsiuisoqarpoq. Vittus Qujaukitsup saamillu inatsisartuini siulittaasup Aili Keskitalop Issittup soqutigineqarnerani Issittumi najugaqartut puigoqqajaaneqartarnerat ataatsimeersuarnermi oqalugiaateqarlutik uparuarpaat.
Taakku oqaatigaat siunissami tamanna eqqumaffigineqarnerusariaqartoq.
USA Issittumi Siunnersuisooqatigiinni 2017-ip tungaanut siulittaasuuffeqassaaq.
