Issittumi Siunnersuisoqatigiinni siulittaasuuffik Danmarkip naalagaaffianut

Issittumi Siunnersuisoqatigiinni siulittaasuuffik naalagaaffeqatigiit Danmark, Savalimmiut Kalaallit Nunaatalu upernaap ilaatigut tigussavaa. Issittumi Siunnersuisoqatigiinni siulittaasuuuffimmik tigusineq issittoq pillugu ataatsimeersuartitsinikkut malunnartinneqassaaq. Ataatsimeersuarnerlu Christiansborgimi Landstingssalimi marsip naggataani (31. marts 2009) pissaaq.
Allattoq Najaaraq Egede
februaarip 14-at 2009 13:32

Folketingi, Nunat Avannarliit Siunnersuisoqatigiiffiat aamma Folketingimi Kalaallit Nunaannut Savalimmiunullu Atatillugu ataatsimiititaliaq peqataassapput.

Danmarkimi nunanut allanut ministeri Per Stig Møller Issittumi Siunnersuisoqatigiinni siulersuisutut suliassanik saqqummiisuussaaq.

Kalaallit Nunaannit peqataassaaq Jonathan Motzfeldt, issittumi Kalaallillu Nunaanni inuussutissarsiornikkut, takornariaqarnikkut aatsitassarsiornikkullu ineriartortitsinermut tunngasunik saqqummiisussaq.

Atlantikup avannaani imaatigut angallanneq eqqarsaatigalugu isumannaallisaaneq aamma sammineqassaaq. Nunatsinnit saqqummiisuussalluni Kangilinnguani sakkutooqarfimmi pisortaq kontreadmiral Henrik Kudsk.

Issittumi inuuniarneq pillugu saqqummiisuujumaarpoq lektor Rasmus Ole Rasmussen kiisalu sillimaniarnermut politikki pillugu saqqummiisuussalluni, Nunarsuatsinni politikkinut tunngatillugu ilisimatusarsimasoq ph.d. Svend Aage Christensen.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq