Issittumi Siunnersuisooqatigiinnut isumaqatigiissut Olsvigip takorusuppaa
Kalaallit Nunaannut ajugaanerunersoq paaserusullugu, isumaqatigiissut allaganngorlugu politikerip illuatungiliuttup takorusuppaa.
- Kalaallit Nunaata Issittumi Siunnersuisoqatigiinni peqataasarnera pillugu Naalagaaffeqatigiit Canadallu akornanni isumaqatigiissummik allaganngorlugu peqarpa? Taamaattoqarpat isumaqatigiissut taanna Naalakkersuisut saqqummiussinnaavaat, assinganillu Inatsisartut Nunanut allanut- Isumannaallisaanermullu ataatsimiitaliaanut nassiullugu? Sara Olsvig aperivoq.
Aleqa Hammond sivikitsumik ilaasortaajunnaartitsinermini kisimi aalajangiisuusimanersoq, naggueqatigiilluunniit Inuit najugaqarfiini suleqateqarsimanersoq, politikerip Inuit Ataqatigiinneersup aamma paaserusuppaa, naggueqatigiimmi Inuit Issittumi Siunnersuisoqatigiinni namminneerlutik taaseqataasarnissartik aamma kissaatigimmassuk.
- Canadap siulittaasuunerani qanorpiaq isumaqatigiittoqarsimanersoq Inatsisartunut soqutiginaateqartorujussuuvoq, Sara Olsvig allappoq.
Naalagaaffeqatigiit iluanni isumaqatigiissut aamma soqutiginaqaaq, Sara Olsvig isumaqarpoq. Aleqa Hammondip oqarnera naapertorlugu Issittumi Siunnersuisoqatigiinni inissat qanoq agguataarneqassanersut nalunaarusiami takuneqarsinnaavoq, isumaqatigiissullu allakkatigut oqaasiinnartigulluunniit pisimanersoq tamanit paasineqartariaqarpoq, Sara Olsvig isumaqarpoq.
