Issittumi siunnersuisooqatigiinni Canada siulittaasuussaaq
Issittumi siunnersuisoqatigiinni Canadamiut ukiuni marlunni siulittaasuutitaqalerunik sunik aallussiniarnersut oqallisigineqaleruttorpoq. Issittormi pillugu ilisimasaqarluartut Issittumilu najugallit suut sammineqartariaqarneri pillugit tamarmik assigiinngitsunik isummersuuteqarsimapput.
Canadamiullumi naalakkersuisuisa suna sammerusunnerunerlutikku qularinngilaat, issittumilu pisuussutsinik piiaanerup inerisarneqarnissaa pillugu Issittumi Siunnersuisoqatigiinni sammineqarluarnissaa kissaatigineqarluni.
Taannaannarli sammissallugu naammanngitsoq isummersortut ilaat isumaqarput. Naggueqatigiimmi Inuit siuttorisimasaata Mary Simon-ip aviisi Canadian Press-imut oqaluttuarnera naapertussagaanni nunarsuatsinni silap pissusaata allanngoriartornerata kinguneranik issittumi ineriartorneq ilimagisamit sukkanerulersimavoq, nunallu allat, soorlu Kina aamma Japan issittumut soqutiginnittorujussuanngortunut ilaapput.
Ilisimasaqarluartullumi allat issittumi umiarsuit angallattarneri pillugit maleruagassat nutarterneqarnissaat, issittullu imartaani annaassiniartarnerup pitsanngorsarneqarnissaa oqallisissatut pingaarnertut sammineqartariaqarsoralutikku.
Leona Aglukkalli nammineq isumaa malillugu Kina-miut EU-lu Issittumi Siunnersuisoqatigiinni qanoq ilusilersukkamik akulerutsinneqassanersut paasineqaqqaartariaqarpoq.
Leona Aglukkallu isumaa malillugu naggueqatigiit Inuit issittormiullu allat issittup inerisarneqarnissaani qitiulluinnartutut inissisimanissaat pingaarnersaajusoraattaaq.