Issittumi sakkutuuliinissaq kinguarteqquaat
Rusland, Canada, USA Norgelu nunanik issittunik taakkualu uuliamik gassimillu peqarluinnarnerannik annertuumik sammisaqarput.
Qallunaat sakkutuuliissapput, apeqqutaaginnarlunili qaqugu, Karsten Nonbo oqarpoq.
- Imatummi inissisimavugut ataasiaannartumik akiliutissanik ujarlertariaqarluta, taamalu ukiunik marlussunnik pingasunilluunniit kinguartitsinissaq immaqa imminut akilersinnaassalluni, Karsten Nonbo oqarpoq.
Illersornissarli pillugu siorna isumaqatigiissummi allassimagaluarpoq Danmarkip nunani issittuni sakkutuuliinissaq issittumilu sakkutooqarfik pilersissagai. Taamani Karsten Nonbop maluginiaqquaa silap allanngoriartornera aammalu nunani issittuni uuliaqarsinnaanerata gasseqarsinnaaneratalu sammineqarnerulerneranni Danmark nunani issittuni malunnaateqarnerusariaqartoq.
Karsten Nonbolli sakkutuuliinissap kinguartinneqarsinnaanerata qallunaat soqutigisaqannginnerannut ersiutaatinnissaa ullumi tunuartippaa.
- Naagga, taamaattariaqanngilaq, pissutigalugu kinguartitsinerit tamarmik immikkut nassuiaammik malitseqartinneqartariaqarmata, isummat pitsaasut aninneqarsinnaalluarput oqaatigalugulu peqqissaarussisoqassasoq tamannalu aningaasanik tunngaveqartariaqartoq, oqaasiinnaanngitsumik.
Immaqalu arlaanik iluatinnaatilimmik ilimasuttoqarsinnaavoq, taama oqarpoq sakkutooqarnermik immikkut misissuisoq Henrik Jørgensen, Københavns Universitetimi sakkutooqarnermut misissiuivimminngaanneersoq.
- Iluamik nassuiarsimanngisatsinnik annertusaassagutta taava allat ima oqassajunnarsipput, ilami Danmarki NATO-p ilagaa NATO-lu avannamut alliartorpoq, Ruslandimilu tamanna akisarialittut paasineqassagunarluni taamaangajattumillu ineriartortitsineqarluni, taamaalilluni sakkussaqarneqqusaanneq taakkua soqutiginavianngilaat.
