Issittumi sakkutooqartitsineq annertusalerpaat
Roy Huebert isumaqarpoq, USA, Danmark pingaartumillu Norge Ruslandimik sakkutooqarniuteqalersut.
Rusland aqqartartunik atomitortunik tallimanik sananiarpoq. Norge aamma Danmark sorsuutinik nutaanik arlalinnik sanaartorput, taakku ilaat sikusiutaasinnaassallutik, aamma USA atomitortunik aqqartartuliorpoq amerlanernillu sanaartornissaminik pilersaaruteqarluni.
Canadami Qaasuitsumi, tassa Resolute Bayimi, sakkutuut sungiusartarfissaat canadamiut sakkutuuisa sananialerpaat, aamma pilersaarutigineqarluni Nanisivimmi aasaru umiarsualiviliortoqassasoq, umiarsuarnut alapernaarsuutinut, kingusinnerpaamik 2014-imi atulersussanut, ilaatigut atorneqartussamik.
Rob Huebertip canadamiut siullermeersumik qallunaanik sakkutuunik qimussimik alapernaarsuisunik Siriusimeersunik suleqateqarnerat nunat killiit pisariaqartinneqassappat ataatsimoorsinnaanerannik Ruslandimut malunnanngingajattumik takutitsiniarneruvoq.
Huebertip erseqqissarpaa, Nunani issittuniittuni aaqqiagiinngissuteqalernissaq peqataasunut ajunaarutaajumaartoq. Taassuma isumakuluutigaa sakkutuunik amerlisaanissaq qaangerniunnermik naggateqarsinnaammat, taamaattumillu isumannaallisaanermik apeqqutit Issittumi Siunnersuisoqatigiinnit oqaluuserineqarnissaa kajumissaarutigalugu.
