Issittumi sakkutooqarnikkut suliassatigut allannguuteqassaaq
Illersornissaq pillugu isumaqatigiissuteqanermut kingullermut atatillugu, Sakkutooqarnernup Issittumi suliassaanik sukumiisumik misissuisoqarnissaanik aalajangiisoqarpoq. Naalakkersuisut taamatut misissueqqissaarnissamut siunnersuutissartik maanna saqqummiuppaat. Suleqatigiissitat Illersornissamut aqutsisoqarfiup pilersaarusiortui pisortaannit Flemming Lentferimit siuttuuffigineqassapput, aammalu ministeriaqarfinnit katillugit qulingiluanit kiisalu Savalimmiunit Nunatsinniillu peqataaffigineqassallutik.
Illersornissamut ministeri Nicolai Wammen naapertorlugu misissueqqissaarneq illersornissaq pillugu tulliani 2017-imi isumaqatigiissuteqartoqarnissaanut pingaaruteqartupilussuussaaq.
- Nunarsuarmiut Issittumut soqutiginninnerat annertusiartuinnarpoq aammalu sillimaniarnikkut nunanullu allanut politikkimut tunngatillugu pingaaruteqaleriartuinnarluni. Taamaammat sakkutooqanikkut suliassaajumaartut siunissami qanoq pitsaanerpaamik kivinniarnissaannut pitsaanerpaamik toqqammavissaqarnissarput kissaatigaarput, Politikenimut oqarpoq.
Misissueqqissaarnermi ilaatigut immap assiliorneqarnera, upalungaarsimaniarneq avatangiisinillu nakkutilliineq kiisalu Issittumi sakkutooqarfinnik nutaanik pilersitsinissamut piariaqartitsisoqarnersoq ilaatinneqapput.
Ministerittaaq Politikenimut naqissuserpaa, Issittumi suliassanut aningaasalersuinerit aallartinneqareersut, ilaatigut qulimiguulinnik imartani angalasartussanut aammalu angallammut nakkutilliissummut nutaamut aningaasaliisoqarsimalluni.
Aammattaaq ilanngullugu oqaatigisinnaavarput Issittumi illersornikkut suliassanut tunngatillugu Sakkutuut imarsiortut ilinniarfianni ullumi ataatsimeersuartoqarmat, nunat atlantikumiittut suleqatigiit aaqqissugaannik. Kalaallit Nunaat pillugu oqaaseqartartut pingasuusut Johan Lund Olsen IA-meersoq peqatigalugu oqallittussaapput.
