Issittumi sakkutooqarnerup annertusinissaa qineqqusaarutigaat
Canadami inatsisartunut qineqqusaartoqarnerani massakkut naalakkersuisunngortut qineqqusaarutigisaat issittumi sakkutooqarnerup annertusinissaa; piviusunnguleraluttuarpoq. Qaammatimmi tulliani issittumi nunamik piginnittussaanermik iliuuseqarneq akisunerpaaq aallartinneqassasoq, Nunatsiaq Newsimi atuarneqarsinnaavoq.
Sakkutooqarnikkut iliuuseq atserneqartoq: ”Iliuuseq Nunalivut” – kalaallisuunngortinneqarsinnaasoq: ”Nuna uagut perput” aallartinneqassaaq apriilip ulluisa sisamaanni.
Canadamit sakkutooqatigiit immikkoortut tallimat, 75inik inuttaqartussaq, qamuteralallutik kmt 4.500t ingerlaviginiarpaat, Qeqertaalummit, Prince Patrick Islandimit, Qaasuitsumiillu aallaaveqarlutik. Ingerlaarnerminni qulaanit timmisartunit Twin Otterinit aqqutissiuunneqassapput. Angallavissaat katillugu 250.000 km2isut isorartutigissangatinneqarpoq.
”Iliuutsip Nunalivut”ip inuttaasa qanga mittarfiusimasut illuutillu suli atorsinnaaneri misissussavaat, issittumi timmisartumik ilaasartaammik ajutoortoqassagaluarpat atorneqarsinnaasunik.
Aqqumminni inussuliortassapput Canadamiullu erfalasui ikkuttassallugit, takutinniarlugu tikisaminnut kikkut piginnittuunersut.