Issittumi sakkutooqarneq isumasioqatigiissutigilerpaat

Kalaallit Nunaanni nunanilu issittuni illersornissakkut piginnaasat pillugit, Illersornissamut ministeri, Nick Hækkerup folketingip illersornissaq pillugu ataatsimiititaliaata ammasumik isumasiorniarlugu ullumi aggersarpaa.
novembarip 13-at 2012 05:41

Ataatsimiititaliaq aggersaavoq, illersornissaq pillugu isumaqatigiissut, 2014-imi atorunnaartussaq allamillu taarserneqartussaq pillugu isumasiuiniarlutik.

Isumasiuinissamut aggersaasuuvoq, partiip Venstre-p illersornissaq pillugu oqaaseqartartua, Troels Lund Poulsen. Taassuma paaserusuppaa, Issittoq pillugu illersornissakkut Naalakkersuisut qanoq nukittorsaaniarnersut.

Troels Lund Poulsenip aamma paaserusuppaa, kalaallit sakkutooqarfinni sulisorineqarsinnaaneri Naalakkersuisunit qanoq pilersaarutigineqarnersoq.

Folketingimi ilaasortap, Sara Olsvigip, Inuit Ataqatigiinneersup, Illersiornissamut ministeri, Nick Hækkerup siusinnerusukkut apeqquteqaateqarfigereerpaa, Kalaallit Nunaanni nunanilu issittumi annaassiniartarnerni piginnaasat qanoq annertutigineri.

Apeqquteqaatilli tamakku suli akineqanngitsut, Sara Olsvigimit oqaatigineqarpoq, ullumilu isumasiuinermi peqataasinnaannginnini ajuusaarutigalugu.

Issittumi Inatsisartuni ilaasortat komite-ata ataatsimiinneranni, samit illoqarfianni Inari-mi Finlandimiittumi, Sara Olsvig folketingi sinnerlugu maanna peqataavoq.