Issittumi Sakkutooqarfiup qullersaqarfissaa RG-p allaffigisimasaanissaaq

Qullersaqarfik Royal Greenlandip Nuummi umiarsualiviup eqqaani allattoqarfigisimasaani inissinneqassaaq, aggustillu aallaqqaataani isertertoqaleriissaaq.

Issittumi Sakkutooqarfik novembarip aallaqqaataani pisortatigoortumik ammarneqassaaq tungaanullu illutaanik nutarterisoqarlunilu allanngortiterisoqassalluni. Attartornissamut isumaqatigiissut ullumi atsiorneqartoq, Danmarkip illersornissaqarfiata ullumi nalunaarutigaa.

Royal Greenlandip allattoqarfigisimasaa allaffeqarfittut atorneqarnerussaaq, imaatigulli angallannermi annaassiniarnermut atatillugu aqutsisoqarfittut aamma atorneqassalluni. Sakkutuut umiarsuaasa timmisartuutaallu kiisalu Siriuspatruljep radioqarfissaattut aamma atorneqassaaq.

Sakkutuut sakkutuujunngitsullu katillugit 36-t Issittumi Sakkutooqarfiup aqutsisoqarfiani sulissapput.

Illersornissaq pillugu isumaqatigiissut nutaaq 2014-ip tungaanut atuuttussaq, Danmarkimi partiinit amerlanerussuteqartunit isumaqatigiissutigineqarpoq, Kangilinnguanilu sakkutooqarfiup Nuummut nuunneqarnissaa matumani siunniunneqarpoq.

Suleqatigiissitaliaq Kalaallit Nunaanneersunik, Savalimmiuneersunik Danmarkimeersunillu ilaasortalik nalunaarusiortuuvoq.

Kangilinnguani aamma Savalimmiuni sakkutooqarfiit taamaasillutik matuneqassapput, "Værnfælles Arktisk Kommando"-millu taallugu Nuummi aqutsisoqarfeqalissalluni.

Tórshavnimi minnerusumik taamaallaat allaffeqarfeqalissaaq.

Kangilinnguani sakkutooqarfiup Nuummut nuunneratigut Kalaallit Nunaanni inuiaqatigiinnut akuunerulernissartik Kangilinnguani sakkutooqarfiup neriuutigaa, sakkutuullu annerusumik suleqatigisartakkaminnut, Nuummi inissisimasunut, qaninnerulernissartik sakkutuut aamma neriuutigaat.