Issittumi Sakkutooqarfiup Nuummut nuunnissaa iluaraa

- Maannamut suliarisatta saniatigut, Savalimmiuni suliarineqartut akisussaaffigilissavavut. Suliassavut akisussaafivullu taamaammat annertusissapput, sakkutuut imarsiortut naalagaat Henrik Kudsk oqarpoq.

Inuit 65-it missaat Kangilinnguani Sakkutooqarfimmi maanna suliupput. Sakkutooqarfittummi suliassat saniatigut allanik isumagisassaqarpoq, soorlu aqqusinernik aserfallatsaaliineq, napparsimmaveqarneq pisiniarfeqarnerlu.

Sakkutooqarfilli Nuummut nuunneqarpat, sulisorineqartut 45-nanngussapput. Sakkutuut 38-t sakkutuujunngitsullu arfineq-marluk.
Nuummimi atortulersuuteqareerpoq, Issittumi Sakkutooqarfiup iluaqutigisinnaasaanik.

Suummi Kangilinnguaniit nuunneqassappat? Allaffeqarnissaq, Henrik Kudskip pisariaqartinnerarpaa, suliassanillu ataqatigiissaariffiusussamik stationeqartariaqassaaq:

- Annaassiniarnernut assigisaannullu ataqatigiissaariffiusussamik pisariaqartitsivugut. Taassuma saniatigut aamma Nuup kitinnguani Kitsissuni radioqarfeqartariaqarpoq, Henrik Kudsk oqarpoq.

Kisianni immikkut timmisartoqarfeqanngillat, Kangerlussuaq atorsinnaammassuk, Nuummilu umiarsualivik aamma atuinnarsinnaavaat.

Naalakkersuisut oqartussaqarfiillu allat qanimut suleqatigineqarsinnaalernissaat periarfissaalissasoq, sakkutuut imarsiortut naalagaata oqaatigaa:

- Sakkutooqarfiup Nuummut nuunneratigut akisussaaffigut aamma annertusissapput, Naalakkersuisut taamaammat qanimut suleqatigisinnaasariaqarpavut, Henrik Kudsk oqarpoq.

Aalisarnermik nakkutilliineq, Aatsitassanik Pisortaqarfiup suleqatigineqarnera, politiillu assersuutigalugu annaassiniarnerni suleqatiginerat pisariinnerulissaaq, soorlu aamma Nummiit Nuummullu Savalimmiunut attaveqaatit pitsaanerulissasut.

Kangilinnguanilu sulisut ilaqutaasa ilaat maanna suliffeqanngillat, naak ilinniarluarsimasuugaluarlutik. Nakorsaq, inatsisileritooq peqqissaasorlu, Henrik Kudskip assersuutigai:

- Taakku Nuummut nuukkunik suliffissaqarniarnikkut periarfissagissaarnerulissapput, Kangilinnguani Sakkutooqarfimmi pisortaq, sakkutuut imarsiortut naalagaat Henrik Kudsk oqarpoq.

Issittumi Sakkutooqarfiup pilersinniarneqarnerani iluarseqqaagassat sukumiinerusut Illersornissamut Ministereqarfiup, Namminersorlutik Oqartussat, Savalimmiunilu oqartussat aaqqissuukkumaarpaat.