- Issittumi sakkutooqarfik Nuummiissava?

Danmarkimi illersornissamut ministeri, Gitte Lillelund Bech, Nuummut ullumi tikissaaq, Issittumi siunissami illersornissamik aaqqissuussinissaq oqaluuseriartorlugu. Gitte Lillelund Bech ippassaq Kangilinnguaniippoq, Naalakkersuisullu siulittaasuat, Kuupik Kleist, Nuummi ullumi ataatsimeeqatigissavaa, Issittumi Sakkutooqarfik siunissami sumut inissinneqassanersoq oqaloqatigiissutigissallugu.

Allattoq Ritzau, Carla Davidsen

maajip 16-at 2011 04:48

Nittartakkap Wikileaksip allakkat saqqummersitai ilutigalugit Gitte Lillelund Bech tikeraarpoq, allakkani saqqummersuni takuneqarsinnaavoq Issittumi Sakkutooqarfiup sumi inissisimanissaa aalajangerneqareersimasoq. Allakkani allassimasut naapertorlugit qallunaat naalakkersuisui isumaqarput, sakkutooqarfik Nuummiissasoq.

Sakkutooqarfiup Narsarsuarmiilernissaa Kommune Kujallermit qangali ilungersuutigineqalerpoq.

Qeqqata Kommunia piffissaq kingullerpaaq atorlugu aamma akuliuppoq. Borgmester Hermann Berthelsen Kuupik Kleistimut allagaqarluni Issittumi Sakkutooqarfiup inissisimaffissaatut Kangerlussuaq Sisimiullu aamma eqqarsaatigeqquai.

Sakkutooqarfik nutaaq pillugu Illersornissamut 2010-miit 2014-ip tungaanut isumaqatigiissut pilersinneqarpoq, Kangilinnguani Sakkutooqarfik aamma Savalimmiuni Sakkutooqarfik ataasiinnanngortinneqassasut, silap pissusaata allanngoriartornera ilutigalugu Issittumi Illersornissaq nukittorsarniarlugu.

Ullormut oqaluuserisassanut aamma ilaavoq qulimiguulinnik annaassiniutinik nutaanik Kalaallit Nunaanni peqalissasoq. SAR-imik taallugu immami isumannaatsuunissaq pillugu isumaqatigiissut sisamanngormat atsiorneqartoq tassunga atavoq.

- Issittumi sakkutooqarfik Nuummiissava?

Aamma atuaruk