Lars Løkke Rasmussen tusagassiuutinut: Issittumi sakkulersunnginneq aarlerinartorsiorpoq
Issittoq sorsuffiunanilu akerleriissuteqarfiussanngilaq – tassa sakkulersorfiunngitsoq.
Tamanna inuiaqatigiit Qalasersuarmut killeqarfeqartut tamanna Ilulissani nalunaarummi 2008-imi isumaqatigiissutigaat.
Tamannalu attanneqassasoq, nunanut allanut tunngasunut ministeri, Lars Løkke Rasmussen (Moderaterne) nittartakkatigut tusagassiorfimmut, Altinget Arktisimut oqarpoq. Issittulli sakkulersorfiunnginnera ilungersunartorsiorpoq.
- Sakkulersorfiunngilluinnartumit sakkulersorfiunngitsumut aarlerinartoqarsinnaasumulli ingerlaarnerput siunersineqarpoq, NATO-mi nunat Issittumut isiginnilernerannik innersuussuteqarluni erseqqissaavoq.
Pingaartumik Ruslandip sakkussiornera Issittumi pissannganartorsiornermik pilersitseqataasoq, nunanut allanut tunngasunut ministeri oqarpoq.
Ruslandip Issittumi sovjettip nalaani sakkutooqarfiit arlallit iluarsaallugillu ammaqqippai.
Folketingip Issittumi timmisartuaqqanut inuttaqanngitsunut, qaammataasat atorlugit nakkutilliinissamut Savalimmiunilu radarimut nutaamut 1,5 milliardit koruunit atorniarlugit 2021-mi akuersissutigaa.
Danskit nunanut allanut tunngasunut ministeriata oqarnera naapertorlugu tamanna naalagaaffeqatigiit Issittumi sakkutooqarnerulersitseqataanngilaq. Tamannali piffissaatilluguli qajassuussinerusoq, taanna isumaqarpoq.
- Issittumi maanna sorsunniarnissamut anguniagaqaataassanngilaq. Kisianni najuunnissarput isumagissavarput taamaalillutalu Ruslandip issittortaata ilaani sakkutuulersornermut atatillugu piviusorsiussalluta. Taamaanngippat upperiatsajassaagut, taanna Altinget Arktisimut oqarpoq.
Folketingimi illersornissamut isumaqatigiissut nutaaq pillugu isumaqatigiinniarnerit maajimi aallartissapput. Kalaallit folketingimut ilaasortaatitaat marluk aamma isumaqatigiinniaqataassapput.