Issittumi qillerisoqassanersoq nalornissutigilerpaat
Nunani issittuni qillerinissaq kukkuneruvoq, Amerikamiut tv-kkut nutaarsiassaqartitsivianni piseqqusaarutit nutaat taama oqaasertaqarput. Aammattaaq taakkunani oqaatigineqarluni, Obamamut sianerit tamannalu oqaatigalugu. Imaannguatsiarporlu nalunaarut Obamamut anngussimasoq. TV-qarfiit, soorlu CNN-ip, uuliamik maqisoorneq kipisuitsungajammik aallakaatitassiarisarpaa.
Tamanna USA-mi pinngortitami ajunaarnersuit ajornersaraat, ajunaarnersuarlu naalagaaffimmut Louisianamut, takornariartitsinermik aalisarnermillu inuussutissarsiuteqarfiusumut, siaruaakkiartorluni, suliffissuaqarfinnut maanna sumiiffippassuarni aserorneqarsimasunut.
Innuttaasut, pingaartumillu aalisartut, kamattorujussuupput, tamannalu misigissutsinik ilaqaqaluni. Piseqqusaarutillu takutitaattut nunat issittut pillugit inuit erngumatsakkaluttuinnarput. Nunani issittuni uuliamik qillerinissamut akerliuniarneq pinngortitamik illersuiniaqatigiiffiup Greenpeacep aallartippaa allagartarsuillu ima allagartaqartut nivinngaassorsimallugit "Issittumi qillerineq inerteqqutaalerli". Taakkua uuliamik Louisianap sissaani katersorneqarsimasumik allanneqarsimapput.
Nutaarsiassaqartitsiviup Associated Pressip ullaap tungaani nalunaarutigaa Amerikami nunami namminermi pissutsinut ministerip Salazarip ukioq 2011 nallertinnagu issittumi qillerinissamut akuerineqarnissamik qinnuteqaatit akuersissutigiumanagit ullumi oqalugiaatigissagaa. Salazarip pilersaarutaani nutaami ullup ilaani aatsaat tamanut saqqummiunneqartussami allassimavoq issittumi qillerisarnermi teknologiimi misissueqqaarnissaq piumasarigini, aammalu USA-mi ujarassiornermi misissuisoqarfik qinnuigissagini issittumi qillerisarnermi ajutoorutaasinnaasut saliinermullu atortuusinnaasut naliliivigeqqullugit.
Uuliasiortitseqatigiiffiup Shellip aasamut misiliilluni qillerinissat tallimat ingerlattussaagaluarpai, taakkuali kinguartinneqarlutik. Ilimagineqarpoq præsident Obamap ullup ingerlanerani Ualerngup Tarajuani (Beaufort Havimi) uuliamik misissuinerit tamaasa unitsikkumaarai, tassa ukiup affaani aggersumi. Obamamut siarnguttut amerlasimassaqaat.
