Issittumi pissutsit soqutigineqarluartut

Justus Hansen, Demokraatineersoq Inatsisartut sinnerlugit ataatsimeersuarnermut peqataavoq. Issittumi silap allanngoriartornera taassumalu malitsigisai nunanit allanit peqataasunit soqutigineqarluartut taassuma oqaluttuaraa.

- Silap allanngoriartornera qanorlu iliuuseqarfigineqarsinnaanera ataatsimersuarnermi sammineqarput. Silip pissusiata allanngoriartornerata iliuuseqarfigineqarnissaanut nakkutigilluarneqarnissaanullu amerlanerusunik aningaasaliiffigineqarnissaa nunanit amerlasuunit isumaqatigiissutigineqarpoq. Issittumimi silap kissatsikkiartornera nunarsuup sinneranut sunniuteqarpoq, Justus Hansen oqarpoq.

Sermersuup aakkiartupiloornera Nunatsinnilu pissutsit nunanit allaneersunit ilisimaneqarluartut taassuma aamma oqaatigaa.

- Nunatsinni inuunerput, piniartullu sikup aakkiartuinnarnerata kinguneranik piniarnerminnik ajornartorsiuteqarnerat pillugu soqutiginittoqartorujussuuvoq apersuutigineqaqalunilu.

CO2-mik aniatitsineq silap allanngoriartorneranut pissutaaqataavoq. Biilillu innaallagiartortut akitsuuteqarunnaarsinneqarpata tamanna aaqqiissutissanut ilaasinnaasoq siunnersuutigineqarpoq.

Biilinut innaallagiatortunut akitsuutit peerlugit

Nunatsinni biilinut innaallagiatortunut akitsuutit peerneqareernikuupput. Taamaaliortoqarneralu aamma nunani allani atugaaleriartorpoq.

- Nunat akitsuutinik atorunnaarsitsisut amerliartorput. Taamaaliortoqarneralu ajunngitsumik uagutsinnut sunniuteqasaaq.

Ataatsimeersuarnermi peqataaneq Nunatta nittarsaanneqarneranut pingaartuusoq Justus Hansenip aamma oqaatigaa.

- Ataatsimeersuarnermi peqataanikkut Erfalasorput Nunarpullu nittarsaappara. Taamaaliornikkut Nunatta ilisimaneqarlualernissaa ataqqeqatigiinnissamullu aqqutissiuussivoq, Justus Hansen New Yorkiminngaanniit oqarpoq.

Kalistat Lund, Inuit Ataqatigiinneersoq, Naalagaaffiit Peqatigiit ataatsimeersuarnerisa immikkoortuata aappaannut peqataajartussasoq taassuma aamma oqaatigaa.