Issittumi mittarfiit isumannaallisagaaneruleqquaat
Issittumi mittarfeeqqat qanoq pissappat? Danmarkimi Kastrupimisulli isumannaallisaanermut atortulersorneqassanerlutik?
Timmisartuni marlunni USA-liartussani qaartartunik nassaartoqareersorlu Amerikami Avannarlermi tusagassiorfinni assorsuaq isumanerluttoqarpoq. Timmisartoqarfinni amerlanerni isumannaallisaaneq suli sakkortunerulerpoq, issittumili timmisartoqarfeeqqat mininneqarput.
Canadami aviisini arlalinni tamanna allaaserineqaqattaarpoq. Isumannaallisaaneq pillugu paasisimasaqarluartoq, Robert Huebert, aviisimut Calgary Heraldimut oqarpoq, issittumi timmisartoqarfeqqat ulorianartorsiornerusut - tassa perulluliortartut ajornannginnerusumik timmisartunut ikisinnaapput, qaartartunilluunniit nassitsisinnaallutik. Robert Huebert isumaqarpoq, timmisartoqarfeeqqat, aamma Issittumi, timmisartoqarfittut angisuutulli isumannaallisaasertariaqartut.
Allalli taama isumaqanngillat. Tusagassiortoq, Mike Bryant, Yellowknife-imeersoq, allappoq, isumannaallisaanerit taamaattut pisariaqanngitsut, nunaqarfeerarmiummi tamarmik imminnut ilisarisimapput, inummillu nalusaminnik takusaqarunik ingerlaannaq malugissallugu. Inullu taanna ilisarisimanngisaat aamma ingerlaqqissinnaanavianngilaq, nassataami timmisartoqarfinni allani aamma misissorneqareertussaapput.
Oqallinnerli aviisini suli ingerlavoq, Issittumullu aamma anngutissagunarluni - soorlu Kalaallit Nunatsinnut. Timmisartoqarfeeqqat timmisartoqarfittut angisuutulli isumannaallisarneqartalissanerpat? Marianne Stenbæk, Montrealimi ilanngutassiortorpoq aperaaq.
