Issittumi mingutsitsineq annertoqaaq
Nunani suliffissuaqarfiusuni suliaasartut, saffiugassat oqimaatsut arrortinneqarsinnaanngitsullu, suliffissuillu aniatitaat toqunartut imerpalasut, POP-nik, ataatsimoortillugit taaneqartartut arrortikkuminaatsullu, issittumi avatangiisinut ilimagisamit annertunerusumik mingutsitsipput. Danmarkimi avatangiisinut tunngasunik ilisimatusarfiup, tassa Dansk Miljø Undersøgelsip, issittumi avatangiisinik mingutsitsineq pillugu Sisimiuni isumasioqatigiinnermi peqataatitai taama oqariartuuteqarput.
Mingutsitsinerit arrortikkuminaatsuneersut silaannakkut anorimit ingerlanneqarlutik immakkullu sarfaanneqarlutik issittumut annguttarput, issittumilu avatangiisaannaanngitsumik, aammali uumassusilinnik, mingutsitsisarput nerisareqatigiineq aqqutigalugu.
Issittumi uumassusillit, inuillumi, nerisareqatigiinneq aqqutigalugu mingutsinneqartut, imerpalasunik arrortikkuminaatsunik ilisimasanit tamanit annertunerusumik akoqartut ,danskit avatangiisit pillugit ilisimatusarfianneersut oqariartuuteqarput.
Issittumi avatangiisinik mingutsitsineq pillugu Sisimiuni massakkut isumasioqatigiinnermi, inuit 70-it peqataaffigisaanni, saffiugassanik imerpalasunillu toqunartortalinnik mingutsitsinerup issittumi inuusunut peqqissutsikkut kingunerisai saqqummiunneqassapput, taamalu mingutsitsinerit issittumi najugaqartunut sunniutaannik qanoq ililluni annikillisaasinnaaneq aamma oqaluuserineqarluni.
