Issittumi inuunerput pillugu misissuineq nutaaq
Issittumi inuuniarnermi atukkat pillugit misissuinermit nalunaarusiaq septembarimi saqqummiunneqassaaq tassanilu nunatsinni ammasumik oqaloqatigiissutigineq ajukkagut ilanngullutik saqqummiunneqassapput.
- Illoqarfiit nunaqarfiillu siullerpaamik qanimut misissuiffigaagut, misissuinermi aqutsisoq Birger Poppel oqarpoq.
- Siornatigut apeqqutigineqarsimanngitsunik innuttaasut misissuinitsinni aperisarpagut. Taamatut pisimavugut nammineq kisitsisinngorlugit paasissutissat pigisatta amigaatai paasisaqarfigerusullugit. Innuttaasut ilinniagaqarsimanersut, suliffeqarnersut, peqqissutsimikkut qanorinnersut ineqarnerminnilu atuagarisaat pillugit aperisarpagut. Apeqqutigullu taakku akereeraangatigit inuunertik ilorrisimaarutigineraat qanitaminnullu attaveqarnertik ilorrisimaarutigineraat aamma apeqqutigisarpagut. Apersuinitsinni sorpassuit qulaajarneqarput. Qulaajarneqartut ilagaat piniartut ilaqutaasalu piitsutut atugaqarlutik inuusarnerat. Tamannalu aatsaat paasineqarmat ilanngullugu tamanut saqqummiussinitsinni paasissutissiissutigissavarput, Birger Poppel naggasiivoq.
Issittumi inuuniarnermi atukkat pillugit misissuinermi nalunaarusiaq, nunat tamalaat issittumi 2007-mi ukiorititaannut atatillugu saqqummiunneqassaaq.
