Issittumi inuit peqqissusaat oqaluuseraat
Nunani issittuni peqqissutsimut suliaqartut aallartitaat Dickey Centerimi, Darthmouth Collegemiittumi sapaatip akunnerani uani katersuummata nakorsaaneq Gert Mulvad peqataasunut ilaavoq:
- Taamaattumilluuna silap pissusaata allanngoriartornerata issittumi inuit peqqissusaannut sunniutigisartagai pillugit ilisimasanik paarlaasseqatigiittarneq pingaaruteqarluinnartoq, Gert Mulvad Radioaviisimut naqissusiivoq.
- Ataatsimiinnermut peqataaneq aammalumi Kalaallit Nunaanniit isummersuutivut saqqummiussinnaagakkit nuannaarutigeqaara, nunanilumi allani susoqarnersoq paaserusullugu, taamaalilluta suliniarnitsinni atorsinnaanngorniarlugit, Gert Mulvad oqarpoq.
Amerikami ilisimatusarfimmi pisortap, Jim Kimip isumasioqatigiinnerup aallartinnerani erseqqarissarpaa, unammilligassat ajornartorsiutillu naalagaaffiit killeqarfii akimorlugit piusut, taamaattumillu sanioqqunneqarsinnaanngitsumik suleqatigiinnissaq pisariaqarluinnartoq.
Annertuumik ajornartorsiutinngortussat ilagaat, uumasorpassuit ingerlaartarfitik allanngortissinnaammatigik immaqaluunniit sumiiffinnut nutaanut allarluinnarmiittunut nussoratarsinnaanerat. Tamanna sumiiffinni ataasiakkaani nerisassaqarniarnikkut suliffissaqarniarnikkullu allanngortitserujussuarsinnaavoq. Ilutigitillugu sullernit uumasunut nassataritillutik nuussinnaapput, taamalu nappaatinik nutaanik tikiuffimminni innuttaasunit akiorneqarsinnaanngitsunik tikiussillutik.
Nunatsinni peqqissutsimik isumaginninnermi allanngoriartuutit eqqumaffigineqarnerunerat, allanngoriaatissanullu silap pissusaata allangornerata nassatarisaanut, nunanut allanut peqataasunut naleqqiulluta piareersimanerunerput, isumasioqatigiinnermi paasinarsivoq.
Silap allanngornerata kingunerisaanik sunniuteqaatissat pillugit qularuteqarnertik peqataasut arlaqartut saqqummiussimavaat, kisianni tassa taamaakkaluartoq annertuumik isumaqatigiissutaavoq, ataatsimoorluni aaqqiissutissat pillugit misilittakkanik paarlaasseqatigiinnissaq suleqatigiinnissarlu pinngitsoorneqarsinnaanngitsoq.
