Issittumi ingeniørinngorniat ukiumut 125-t ilinniarsinnaalernissaat ilimagineqartoq

Issittumi Teknologiimi Inerisaavik nutaamik ullumimiit atuutilersumik pisortartaarpoq. Pisortanngortup Carl Egede Bøggildip anguniarpaa issittumi ingeniørinngorniat ukiumut 125-t ilinnialersarnissaat.
oktobarip 01-at 2012 12:23

Issittumi teknologiimi inerisaavimmi pisortartaap Carl Egede Bøggildip anguniarpaa, nunatsinni ukiumut inuit 125-it ingenørisut ilinniakkaminnik aallartittalernissaat. Ilinnialersartussat taamak amerlatigineri,  sinnattuinnaasorineqarsinnaassagaluartoq, Issittumi Teknologiimi Inerisaavimmi pisortartaap Carl Egede Bøggildip piviusunngorsinnaannissaa ilimagaa.

- Soorunami ilinniartut 125-it siunissami aallartittartussat taamaallaat Kalaallit Nunaaneersinnaanngillat, una ilinniagaq nunanit tamalaaneersunut aamma neqeroorutaassaaq, taamaammat ilinniartut 125-t ukiumut aallartittarnissaat piviusunngorsinnaavoq. Kalaallit Nunaanni ingeniørit annertuumik amigaataapput, taamaammat pingaaruteqarpoq nunat tamalaaneersunik ilinniartoqalersinnaannissaq, Issittumi Teknologiimi Inerisaavimmi pisortartaaq Carl Egede Bøggild oqarpoq. Taassuma ilanngullugu oqaatigaa ingeniørit nunarsuaq tamakkerlugu amigaataasut.

- Ilinniarnerup ingerlarngata pitsaassusissaa qaffasissuussaaq, ilinniartut ikittuinnaat ukiumut aallartittarnerat  akisuujuvoq. Taamaammat pingaaruteqarpoq, issittumi ingeniørit ilinniarnerisa qaffasissuunissaat, Issittumi teknologiimi inerisaavimmi pisortartaaq Carl Egede Bøggild oqarpoq.

Issittumi teknologiimi Inerisaavik tusagassiutinut ullaap tungaa nalunaarutaani allaqqavoq, ukioq 2040-up tungaanut Nunatsinni ingeniørit 600-t amigaatigineqartussaassasut. Ingeniørit amigaatigineqartussat, illuliortiternerni, avatangiisinik ilisimasaqarnermut, nunap ataqatigiinneranut aaqqissuunneqarnissaanut immikkut ilisimasaqarnissaannik ilaatigut atorfissaqartinneqassalutik.

Ilinniarfiup aningaasalersorneqarnissaa oqartussanit, aningaasaateqarfinniillu ingerlanneqarnissaat naatsorsuutigineqarpoq.