Issittumi inatsisartut Kirunami ataatsimeersuarput

Issittup inatsisartuini ilaasortat 150-t Sverigep avannaani Kirunami ataatsimeersuarnerat ippassaq aallartippoq. Silaannaap allanngoriartornerata kingunerisaanut qanoq iliuuseqartoqarnissaa, issittullu ukiuni marlunni tulliuttuni immikkut ilisimatusarfigineqarnissaanut tunngasut ataatsimeersuarnermi pingaarnertut sammineqarput. Issittumi naalagaaffiit inatsisartullu qanoq aaqqiiniuteqarnissaannut aamma inassuteqaasiortoqarpoq. Nunarput sinnerlugu ataatsimeersuarnermi peqataasoq inatsisartuni Folketingimilu ilaasortaq IA-meersoq Kuupik Kleist aperaarput nunarput sinnerlugu qanoq oqariartuuteqarnersoq, imatullu akivoq:

- Issittumi inuiaqatigiit pitsaanerpaamik inissinniarnissaat siunertaralugu peqataavunga.

Kuupik Kleist issittumi inatsisartunut naalagaaffinnut naalakkersuisunullu EU-mullu inaarutaasumik inassuteqaatissat isumaqatigiissutiginiarneqarneranni aamma peqataasoq isumaqarpoq ajunngitsumik angusaqarsimallutik.

- Pisariaqarluinnarpoq silaannaap allanngoriartornerata kingunerinut iliuuseqarnissamut naalagaaffiit suleqatigiissinnaanissaat. Ilisimatusarnikkut paasisanik issittumiittunut iluaqutissanngortillugit paarlaateqatigiittarnissaq pingaaruteqarpoq.

Issittumi sermip sikullu aakkiartuinnarnera ilutigalugu issittumi aatsitassarsiornermut soqutiginninneq annertusiartuinnarpoq.

- Tassani uagut soorunalimi soqutigisarput tassaavoq; issittumi najugaqartugut aatsitassarsiortoqarnerani iluaquserneqarnissarput, aningaasarsiortoqarneranilu peqataanissarput. Taassuma saniatigut issittumi najugaqartugut ilinniartitaanikkut iluaquserneqarnissarput, aalajangersaanermi ilanngullugu isumaqatigiissutigitipparput.

Ataatsimeersuarnermi peqataasut ullumi inassuteqaasiorput, taanna issittumi naalagaaffinnut, inatsisartuinut, naalakkersuisunut, EU-mut USA-mut Ruslandimullu assigiinngitsunik iliuuseqaqqusissummik aningaasalersuinissaannullu inassuteqaammik imaqarpoq.

Issittumi inatsisartuni ilaasortat ataatsimeersuarneranni inassuteqaateqqarnissaq pillugu isumaqatigiinniarnerit aqagu ataatsimeersuarnerup ulluani kingullermi nangeqqinneqassapput.