Issittumi illersornissaqarfik sulilluarnerulersoq
Naalagaaffiup aningaasartuutaanik kukkunersiuisut oqaaseqaataanni tamanna takuneqarsinnaavoq. Taama pisoqarpoq naalagaaffiup aningaasartuutaanik kukkunersiuisut Illersornissaqarfik siusinnerusukkut isornartorsiorsimammassuk Issittumi pisussaaffimminik naammassinnissimanngitsutut.
Illersornissaqarfiup Issittumi sulinini pitsaanerulersissimavaa. Naalagaaffiup kukkunersiuisui taama isumaqarput.
Illersornissaqarfimmiut sulisutik 2013-imili ilinniagaqartittarsimavaat, Issittumi sinerissami nakkutilliissutini tamani inuttaasuni ikinnerpaamik marluk imaani avatangiisinik immikkut ilinniagaqartunngorlugit.
Issittumi avatangiisini ajunaarnersuaqassagaluarpat tamakku pinngitsoorneqarsinnaanngillat.
Taassuma saniatigut Illersornissaqarfimmiut 2013-imut naleqqiullugu ullumi Kalaallit Nunaata imartaani umiarsuarnut ikillutik nakkutilliinerujussuulersimapput.
Avatangiisit illersorneqarnissaannut peqqussutit malinneraat ukioq manna januaarimiit juulip qaammataata tungaanut umiarsuit 99-it misissuiffigineqarsimapput. Anguniagaavoq umiarsuit imartatsinniittut 20 procentiisa misissuiffigineqartalernissaat. Ingammik avatangiisinut ajoqutaasorujussuaq uulia oqimaatsoq ikummatigippassuk.
Naalagaaffiup aningaasartuutaanik kukkunersiuisut 2013-imi danskit illersornissaqarfiat isornartorsiorpaat Issittup inuinik avatangiisaanillu arlalitsigut mianersuussinngimmat.
Assersuutigalugu Kalaallit Nunaata imartaanik assiliornerit arriippallaarnerarlugit assut isornartorsiorneqarsimapput.
Kukkunersiuisut immikkoortoq aalajangiusimasatuaat tassaavoq Geodatastyrelsip Kalaallit Nunaata imartaani assiliornerit 41-it 2018-imi tunniunneqartussaagaluit kinguartittariaqarsimammatigit Københavnimiit Aalborgimut nutserneq pissutigalugu.
Immap assiliornerit pillugit Namminersorlutik Oqartussat isumaqatigiissutigineqarfigisimapput, taakkulu kukkunersiuisut nakkutiginiarpai.
Kukkunersiuisut aamma naammagisimaarpaat naalakkersuisut Namminersorlutik Oqartussat peqatigalugit imartat illersorneqarnissaat pillugu inatsisiliormata, inatsillu taanna Nunatta sineriaaniit 200 sømilitut avasitsigisoq tikillugu atuutissaaq.
