Issittumi ilisimatusarumasut amerliartorput

Issittumi ilisimatusarneq pingaartinneqaleriartuinnavippoq. Issittumimi ilisimatusarumasut amerliartupilooqaat. Taamaammat Danmarkimi Avatagiisit Nukissiuteqarnerlu pillugit qitiusumik aqutsisoqarfik - Det nationale Center for Miljø og Energi - EU-llu aningaasaliiffigisaanik pinngortitarsuarmi tammaarsimaffinnik nalunaarsuisarfik INTERACT-imik taaguutilik suleqatigiillutik tammaarsimaffiit tamavimmik sukumiisunik paasissutissiornialerpaat.
Allattoq Knud Reimer
juulip 07-at 2012 15:44

Atuagassiaq paasissutissanik imalik - INTERACT Station Catalogue -imik taaguuserneqarsimasumi issittup pinngortitarsuani uumassusileqatigiit pillugit ilisimatusartut tammaarsimaffii assitagissaaqisut atuarneqarsinnaapput. Aamma issittumi ilisimatusarnermut atatillugu ilisimatusaatit allat, soorlu silap pissusaa pillugu ilisimatusarnerit, nunap pissusaa pillugu ilisimatusaatit - Geovidenskab - aamma Kryologi, tassa uumasuaqqat tappiorannartut issittumut naleqqussarsimasut pillugit ilisimatusaatit atuagassiami paasissutisiissutigineqarput.

Atuagassiaq issittumi suut ilisimatusaatigineqarnersunut paasissutissatsialaavoq, ilisimatusartummi sumiiffinni piukkussaminni paasissutissat allat, soorlu periarfissat suuneri, silap pissusaata qanoq innera, angallanneqarnissamut periarfissat allarpassuillu atuagassiaq qupperarlugu maanna paasisinnaanngorpaat.

Ilisimatusartunulli tammaarsimaffiit 45-t atuagassiami eqqartorneqartut issittumiiginnanngillat. Tassami ilaatigut Østrigimi, Polenimi Tjekkiamilu aamma nassaassaammata.

Nunatsinnulli tunngatillugu Tunup avannaarsuani ilisimatuut tammaarsimaffiat Zackenberg, Namminersorlutik Oqartussat, Aarhusip Universitetiata, kiisalu Pinngortitaleriffiup ataatsimoorullugu pigisaat pillugit atuagassiami atuarneqarsinnaapput, soorlu Qeqertarsuarmi Arktisk Stationi Københavnip Universitetiata pigisaa kiisalu Tunup kujataani Sermilimmi ilisimatuut tammaarsimaffiat pillugit atuagassiami aamma atuarneqarsinnaasut.

Atuagassiaq Jan Elmer Topp-Jørgensenip allat pingasut suleqatigalugit aaqqissuussarivaat, atuagassiarlu pillugu INTERACT Station Manager Forum-imi siulittaasoq Morten Rasch atuagassiap aallaqqaasiutaani ilaatigut ima allappoq:

- Atuagassiaq INTERACT Station Catalogue issittumi ilisimatusartunut atugassarititaasunut pitsanngorsaanermut qulakkeerinninniarsarivoq. Tassami issittumi ilisimatusariaatsit nutaalianngoriartuinnavillutillu annertusiartupilooqimmata atuagassiaq taakkununnga pisariaqarlunilu iluaqutaasussapilussuussaaq, Morten Rasch allappoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq