Issittumi ilisimatusartut
Nunat Tamat Issittunut Ukiorititaat aappaagu aallartippat, 2007-imi marsimiit 2009-p tungaanut ilisimatuut Sikuijuitsumi avannarlermi kujallermilu misissuissapput. Ilisimatusartussanit 400-nit amerlanerusunit ilisimatusartussat 140-t nunatsinni ilisimatusarniarlutik pilersaaruteqarput.
Ilisimatusarnissat amerlanersaasa aningaasaliisoqarnissartik amigaatigaat. Taamaattumik maannagaaq nalunarallarpoq pilersaarutit sorliit piviusunngortinneqassanersut. Taamaakkaluartorli Danmarkimi tusagassiortunik ullumi katersortitsisoqarpoq.
- Piffissaagallartillugu piareersarnissaq pisariaqarpoq, aamma tusagassiuutinik katersortitsisarnissaq pisariaqarluni, ilisimatusarnermi ataqatigiissaarisoq issittumi pissutsinik ilisimatusarfimmeersoq, Henning Thing taama oqarpoq. Nangipporlu Kalaallit Nunaanni ukiuni tulliuttuni ilisimatusarnissaq eqqarsaatigiinnarlugu inuit 350.000-t nunani 50-ineersut pilersaaruteqarput taavani ilisimatusarniarlutik. Taamaalillutik nunarsuarmi inuippassuit ilisimatusarnermi paasisanik assigiinngitsunik oqaluttuunneqarsinnaalissapput.
Henning Thing aperaarput Nunat Tamat Issittunut Ukiorititaat inuit naliginnaasut sumut atorsinnaaneraat, ima akivoq:
- Issittumi nunat nunarsuup sinneranut sunniuteqartarnerat kikkut tamarmik paasissavaat. Nunarsuarmi issittoq pingaarutilerujussuuvoq. Paasissutissarpassuit sermersuarni qerisimasutullusooq illutik aaneqarnissartik utaqqiinnarpaat. Taakku paasissutissiisartup iluaqutigissaqqaarpai aammali soorlu inuit naliginnaasut kiisalu naalakkersuinermik suliaqartut paasissutissanik periarunik issittoq qanoq pingaaruteqartiginersoq paasissagaluarpaat, Issittumi pissutsinik ilisimatusarfimmeersoq Henning Thing taama oqarpoq.
Pilersaarutit tamarmik piviusunngortinneqassagunik 300 million koruunit pisariaqartinneqassapput. Henning Thingilli Nunat Tamat Issittunut Ukiorititaannut danskit ataatsimiititaliaatalu pingajorarterutaasa aningaasaliiffigineqarnissaat eqqoriarpaat. Tassa imaappoq 100 million koruunit issittumi ilisimatusarnermut immikkoortinneqassapput.
