Issittumi ilisimatusarnissamut 10 millioni koruunit missaat atorneqassapput

Sooruna ukiuni kingullerni sermersuup aakkiartornera taama sukkatigisoq? – Tatsinut Qaanaap avannaaniittunut tamanna qanoq sunniuteqarpa? Qulequttat taakkorpiaat ilisimatuunit maanna akissutissarsiorfigineqartut, nutaarsiassaqartitsivik Ritzau allappoq.

Issittumi ilisimatusarnissat aqqanillit Pinngortitaq Avataarsuarlu pillugit ilisimatusartut siunnersuisooqatigiivisa 9,4 millioni koruuninik aningaasaliiffigaat. Siunnersuisooqatigiit Ilisimatusarnermut ministereqarfimmut atapput.

Aningaasat amerlanersaat ilisimatusarnermi atortunut angallattakkanut atorneqassasut, siunnersuisooqatigiinni siulittaasoq, ilisimatooq, Lars Stemmerik, ilisimatitsivoq.

-Tunup avannaani pinngortitaq imaannanngeqimmat timmisartunik, qulimiguulinnik, atortussanik orsussamillu assartornermut aningaasarpaaluit atorneqarnissaat ilimagaarput, issittumi ilisimatusarnermik misilittagaqarluartoq, Lars Stemmerik, oqarpoq.

Ilisimatusarneq Station Nordimi najugaqarluni ingerlanneqassaaq. Tassanngaanniit Dansk Polarcenterimi ilisimatusarnermi atortunik nassitsisartut pisortaannik ilisimatusarnermi pingaaruteqarluinnartut ataqatigiissarneqassapput. Ukiut 2007-miit 2009-mut nunat tamalaat issittumi ilisimatusarfiinik taaguuserneqarnikuupput.

Nunatsinni sermersuaq ukiumut 100 kubikkilometeri angullugu aattarpoq. Sermersuaq tamakkerluni aassagaluarpat nunarsuarmi imaq meterit arfineq-marluk angullugit qaffariassaaq.