Issittumi ilisimatusarneq nukittorsarneqartoq

Issittumi ilisimatusarnerup nukittorsarneqarnissaa atsioqatigiissutigineqarpoq. Ilisimatusarnermut naalakkersuisut nunanit assigiinngitsunit 25-neersut Washingtonimi ataatsimeeqatigeereerlutik taassuminnga pingasunngormat atsioqatigiipput.
Assi © : The White House, US
Allattoq Anton Gundersen Lihn, Sara K. Jakobsen
oktobarip 02-at 2016 11:06

Issittumi ilisimatusarneq pillugu siullerpaamik taama ataatsimeeqatigiittoqarpoq.

USA-p præsidentia Barack Obama ataatsimiinnissamut qaaqqusisuuvoq, ilinniartitaanermut naalakkersuisoq Nivi Olsen qaaqqusani ilaalluni.

Nunat tamakku atsioqatigiimmata issittumi ilisimasanik paasissutissanillu katersuisarneq avitseqatigiittarnerlu pitsaanerulersillugu ilisimatusarneq nukittorsarpaat.  

EU-llu issittumi misissuinissamut, soorlu assersuutigalugu silap pissusiata allanngoriartorneranut tamatumalu  nunarsuup sinneranut sunniutigisinnaasai misissorneqarnissaanut, 300 millionit koruuninik aningaasalersuiniartoq, ataatsimeereernermi aamma nalunaarutigineqarpoq.

Issittumi siunnersuisoqatigiinni ilaasortat nunanilu issittuni nunap inoqqaavi ataatsimiinnermi aamma peqataapput.

 

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq