Issittumi ilisimatusarneq Naalagaaffeqatigiit siuttuuffigisariaqarpaat
- Issittoq tamaat soqutigineqaleraluttuinnartillugu aamma ilisimatusarfiginissaa nunarsuarmi tamarmit soqutigineqaleraluttuinnarpoq. Danmark tamatumani nukittuumik inissisimavoq, tamannalu atorluartariaqarparput. Nukiit kattunnerisigut tamanna angusinnaavarput, immikkoortititaarata ataatsimut kivitseqatigiittariaqarpugut.
Issittumi ilisimatusarneq pillugu oqallittarfittaaq ilaatigut issittumi ilisimatusarneq pillugu ukiumoortumik nalunaarusiortassaaq suliniuteqarfigisassanullu nutaanut siunnersuuteqartarluni. Peqatigitillugu aamma Ilisimatusarnermut, Nutaaliornermut Ilinniakkanullu ingerlaqqiffiusunut ministeriaqarfimmi Issittoq pillugu allattoqarfiliortoqassaaq, issittumi ilisimatusarneq pillugu apeqqutissaqartut siunissami ataasiinnarmut saaffiginniffissaqarniassammata.
-Danmarkip tunniussaqarsinnaanera nunanut allanut takutissinnaassallugu aammalu danskit issittumi ilisimatusarnerannut aningaasaliinerup atortorissaarutitsinnillu atuinerup akilerluarsinnaanera paasineqassasoq neriuutigaara. Nalagaaffeqatigiinni tamarmi issittoq pillugu ilisimatusarnerup soqutiginarnerulersittariaqarparput. Aamma aningaasaateqarfiit namminersortut tapiissuteqarnissaat ajornannginnerulersillugulu pilerinarnerulersipparput, Østergaard nassuiaavoq.
Issittumi ilisimatusarfiit suleqatigiissutigiissutaannut Arctic Universitymut aningaasaliissutit 2013-imi 2014-imilu affaannanngortinneqarsimanerat pillugu Sara Olsvig IA-meersoq danskit naalakkersuisuinik isornartorsiuisimavoq. Tamannali nassuiaatissaqarluarpoq.
-U Arctic sernigalugu soqutiginninnerput takutissimavarput, piviusorli tassaavoq aningaasaliissutigineqartut tamakkerlugit atorneqartarsimanngimmata, taamaattumillu naatsorsuutigisamit aningaasat amerlanerusut aningaasaliissutigineqartarsimannata, ministeri oqarpoq, taassumattaaq ilisimatusarfiit suleqatigiinnerannut ukiumoortumik 3 mio. koruuninik aningaasaliisoqartarnissaa sulissutiginiarlugu oqaatigaa.
-Suliaqarfiit ingerlaannarnissaat ineriartortinneqarnissaallu qulakkeerniarlugit politikkikkut piumassuseqarpugut. U Arctic iluarisimaarlugu tapersersorparput.
Issittoq pillugu allattoqarfiup suliassaasa ilagaat issittumi ilisimatuut ulluannut taarsiullugu issittoq pillugu ilisimatusarneq pillugu ukiumoortumik ataatsimeersuartitsinissamik aaqqissuussisarnissaq. Peqatigitillugu aamma ilinniartitaanermut naalakkersuisup danskillu ilinniartitaanermut ministeriata ukiumoortumik naalakkersuisutigoortumik ataatsimiittarnissaat aalajangiunneqarsimavoq. Ministeriaqarfimmi allanngortiterinerit malitsigisaannik Issittoq pillugu ilisimatusarnermut ulloqartitsisarneq taamaatiinnarneqarpoq.
