Issittumi ilisimatusarneq Canadami naalakkersuisut tapersersorpaat

Ilisimatusarnermut qitiusoqarfik nunarsuarmi pitsaanerpaat ilaat Naalakkersuisut ukiut tulliuttut marluk ingerlaneranni sananialersaarpaat, ilisimatusarnermullu qitiusoqarfiup taassuma sapinngisamik nutaaliaanissaa teknikkikkullu atortorissaarusersugaalluarnissaa anguniarlugu 400 millionit koruunit sinnerlugit aningaasaliiniarlutik. Leona Aglukkap, Nunavut sinnerlugu inatsisartuni ilaasortap, oqaatigaa ilisimatusarfittut qitiusoqarfik naalakkersuisut maanna sananialigaat naggueqatigiinnut inunnut kinguaariippassuarnut iluaqutaajumaartoq.

Taanna Nunavumi nunaqarfiit avannarlerpaartaasa ilaanni sananeqassaaq. Qausuittuq, Resolute Bay, Iqaluktuuttiaq, Cambridge Bay, imaluunniit Mitsimatalik, Pond Inlet, pineqarput. Naatsorsuutigineqarpoq ministeriunerup Harperip, aggustimi kingusinnerusukkut issittumi angalaartussap, ilisimatusarfittut qitiusoqarfissap nutaap sumiinnissaata aalajangiunneqarnera tamanut saqqummiukkumaaraa.