Issittumi ilisimatusarneq aningaasaliiffigineqarpoq

maajip 12-at 2005 08:08

Danmarkimi ilisimatusarnermut siunnersuisoqatigiit, suliffeqarfimmut sumulluunnit pituttorsimanngitsut, suliniutinut arfineq-pingasunut katillugit 100 million koruuninik ippassaq aningaasaliissuteqarput, taakkununnga ilaalluni, issittumi ilisimatusarneq.

Aningaasaliiffigineqartut tassapput, ilisimatusarnerit nutaat imaluunnit nunat tamalaat peqataaffigisaannik Danmarkimi qitiusumik ingerlatsiviusinnaasutut nalilerneqarsimasut.

Namminersornerullutik Oqartussat ilisimatusarnernik ataqatigiissaarisua Tom Greiffenberg oqarpoq, Danmarkimi ilisimatusarnermut ministereqarfimmut nalunaarummik tunniussisoqareersorlu maanna aningaasaliissuteqartoqartoq.

Nalunaarummi allaaserineqarpoq, danskit nunatsinni ilisimatusarnerat nukittorsarneqartariaqartoq, kisitsisitigullu paasissutissat takutikkaat, nunatsinni ilisimatusaatigineqartut ikiliartulersimasut.

Maannali nunatsinnut tunngasunut aningaasaliissuteqartoqarpoq, nunatsinnilu suliffeqarfiit suleqatigalugit ilisimatusartoqarnissaa ilimagineqarpoq. Nunat Tamalaat Issittumut Ukiorititaat 2007-imit 23008-mut atuutissaaq, ukiorlu taanna ilisimatusarnernut atorneqassappat, aallartereernissaq ajornaquteqanngilaq.